“Barsa” haydayotgan qariya jahon chempionatiga boradi

“Barselona” rahbariyati jamoada eng katta maosh olayotganlardan biri – Jerar Pike bilan tezroq xayrlashishga qaror qilgan. Xavi ham  yoshi katta o‘yinchiga boshqa imkoniyat bermoqchi emas.

Kataloniyaliklar Pikega ishonch bildirmayaptgan bir paytda Ispaniya terma jamoasi bosh murabbiyi Luis Enrike unga Qatardagi jahon chempionatida o‘ynash imkoniyatini taqdim etmoqchi.

Marca nashrining yozishicha, Pike mundialga tayyorlanayotgan Ispaniya terma jamoasining kengaytirilgan tarkibiga kiritildi. Umuman olganda, murabbiylar shtabi jami 55 nafar futbolchini ko‘rikka taklif qilgan.

Mutaxassislarning ta’kidlashicha, termadan taklif olganiga qaramay, Pike va Serxio Ramosning Qatarga borish imkoniyati kam. Chunki ular tarkibdagi joy uchun Emerik Laport (“Manchester Siti”), Inigo Martines (“Atletik” Bilbao), Pau Torres (“Vilyarreal”), Diego Lorente (“Real Sosedad»”) va Ugo Gilyamon (“Valensiya”) bilan raqobatlashishi bor.

Ispaniya terma jamoasi jahon chempionati guruh bosqichida Germaniya, Yaponiya va Kosta-Rika bilan bellashadi.