“Барселона” Альварес трансфери юзасидан “Атлетико” билан боғланди

"Барселона" Хулиан Альварес трансфери устида ишламоқда.

Каталония жамоаси бош мураббийи Ханс-Дитер Флик раҳбариятдан ёзги трансфер ойнасида марказий ҳужумчи позициясини кучайтиришни сўради ва "Атлетико" футболчиси бу ролга асосий номзод ҳисобланади.

ESPN маълумотларига кўра, "блауграна" Мадрид клуби билан боғланиб, футболчининг эҳтимолий трансфери бўйича унинг позициясини билиб олган. "Барселона" бу келишувни амалга ошириш қийин бўлишини билади, бироқ футболчининг Антуан Гризманн билан бўлганидек, жамоани ўзгартириш истаги муҳим роль ўйнаши мумкин, деб ҳисоблайди.

Аргентиналик футболчининг шартномасида кўрсатилган товон пули миқдори 500 миллион еврони ташкил этади.

Қайд этилишича, "Атлетико" Альвареснинг ёзда кетишига йўл қўймаслик учун унга 2032 йилгача яхшиланган шартнома таклиф қилишга тайёр.

Жорий Ла Лига мавсумида Хулиан 29 та ўйин ўтказиб, 8 та гол урди ва 4 та голли узатмани амалга оширди.