“Барселона” навбатдаги трансфер учун 60 миллион евро сарфлаши мумкин

Каталониянинг "Барселона" клуби яқинда польшалик ҳужумчи Роберт Левандовски билан шартнома имзолади. Бироқ, “кўк-анорранглилар” бу билан тўхтаб қолишни истамаяпти.

Инсайдер Фабрицио Романо ўзининг ижтимоий тармоқдаги саҳифаларида маълум қилишича, “Барса” энди Франция терма жамоаси ҳимоячиси, ҳозирда “Севилья” шарафини ҳимоя қилаётган Жюль Кунденинг трансферига эътибор қаратган. Клуб бош мураббийи Хави Эрнандеснинг шахсан ўзи ушбу футболчини қўлга киритиш учун ҳаракат қилмоқда. Мутахассиснинг фикрича, Кунде жамоанинг ҳимоя чизиғи учун идеал фулбэк ҳисобланади.

Шунингдек, францияликка "Челси" ҳам қизиқиш билдирмоқда, аммо Каталония клуби Жюль борасида лондонликлардан илғорроқ ҳаракат қилмоқчи ва унга аниқ таклиф билан чиқишни мўлжаллаган.

“Transfermarkt” нашри маълумотларига кўра, 23 ёшли футболчининг трансфер нархи 60 миллион еврога баҳоланмоқда.