“Бавария” “Барса” юлдузига даҳшатли маош ваъда қилди

“Бавария” ҳужум чизиғини кучайтириш мақсадида “Барселона”дан кетишга яқин турган Усмон Дембелени ўз сафига қўшиб олмоқчи.

L'Equipe нашри Каталония клубининг молиявий аҳволи франциялик ҳужумкор футболчи сўраётган маошни кўтара олмаслигини таъкидламоқда. Мюнхенликлар бу вазиятдан фойдаланиб қолмоқчи.

Манбанинг таъкидлашича, бир неча мавсумдан бери Бундеслига чемпионлигини ҳеч кимга бермай келаётган “Бавария” 25 ёшли футболчига каталонияликлардан кўра яхшироқ шартнома таклиф қилмоқда. Унга кўра, Усмон Бундеслига грандига қўшилса, тўрт йиллик битим ва ҳар мавсум учун 18 миллион евродан маош олади.

Шу ўринда, Дембелега яна бир қудратли харидор борлигини унутмаслик лозим. ПСЖ Усмонни Францияга қайтариш учун бошқа барча клублардан кўпроқ тўлашга тайёр.