Бектемир вазнидан қатъи назар дунёнинг энг зўр боксчилари қаторидан жой олади!
Бокс оламида ўз нуфузига эга бўлган Asianboxing.info сайти яқин йиллар ичида вазн тоифасидан қатъи назар дунёнинг энг кучли профессионал боксчилари рейтингида (pound-for-pound) кучли ўнликка кириши мумкин бўлган чарм қўлқоп усталари номини эълон қилди.
Мазкур сайт мутахассислари таҳлилларига кўра, Бектемир Мелиқўзиев 2023 йилга бориб, P4P-рейтингининг энг юқори поғоналарида қайд этилади. Ҳамюртимиздан ташқари, кучлилар қаторига қозоғистонлик Турсинбой Қулаҳмет, япониялик Косеи Танака, Дзюнто Накатани ва америкалик Жесси Родригес ҳам энг кучли боксчилар рўйхатидан жой олишга даъвогар ҳисобланади.
Бектемир Мелиқўзиев профессионал боксга ўткагина кўп бўлгани йўқ. Фарғоналик чарм қзлқоп устаси дастлабки профессионал жангини 2019 йилнинг 13 июнида Мартин Риос Фиделга қарши ўтказиб, катта тажрибага эга рақибини биринчи раунднинг ўзида соф нокаутга учратганди.
Барча жангларини АҚШда ўтказаётган Бектемирга промоутерлар профессионал рингда кўп жангда иштирок этган ва рейтингдан юқори поғоналарда қайд этилган рақибларни рўбарў қилмоқда. Бунинг самарасида, ҳамюртимиз дастлабки чемпионлик камарларини қўлга киритиш учун кам вақт сарфлаяпти. Хусусан, Мелиқўзиев ўтган йили декабр ойида ўзининг тўртинчи жангида Ваугн Александрни очколар ҳисобида мағлуб этиб илк соврини - World Boxing Association Continental Americas минтақавий чемпионалик камарига эга бўлди.
Бектемир жорий йилнинг 30 октябрь куни олтинчи жангида Алан Кампани учинчи раундда рингга қулатиб, World Boxing Organisation Inter-Continental қитъалараро чемпионлик камарини ҳам ўзиники қилди.
Умуман олганда, бу боксчимиз олтита жангдан бештасини нокаут ва биттасини очколар ҳисобида ўз фойдасига ҳал қилган ва у рейтингда жадал кўтарилиб бормоқда.
24 ёшли спортчимиз ҳаваскорлар ўртасида ҳам юқори натижаларни қайд этгани ва катта тажриба тўнлагани унинг профессионал сифатидаги фаолиятида ҳам қўл келмоқда. Бектемир 2014 йилда ҳаваскор бокс бўйича ёшлар ўртасида Осиё, жаҳон ва Олимпия ўйинлари чемпиони бўлган. Катталар ўртасидаги мусобақаларда икки карра Осиё чемпиони, жаҳон чемпионатлари кумуш ва бронза медали соҳиби, Рио Олимпиадаси вице-чемпиони сифатида шоҳсупадан ўрин олган.
Бектемир Мелиқўзиев учун 2021 йилги мавсус ўта масъулиятли ва аҳамиятли давр бўлади. Унинг менежерларидан бири Алико Фролов навбатдаги жанглар ҳақида қуйидаги фикрларни билдирган.
- Aгар барчаси режадагидек кетса, биз кейинчалик собиқ жаҳон чемпиони Девид Лемьё, Дениэль Жейкобс ва шу каби машҳур боксчиларга қарги жанг қиламиз. Бизга Сергей Ковалёв ёки Салливан Баррера каби номдор рақибларни ҳам таклиф қилишган эди. Бу борада биздан сўрашнинг ҳожати йўқ. Бектемир айни пайтда 76 килограмм вазн тоифасида жанг қилаётган бўлса-да, оғирлиги 79 кило бўлган рақиблар дивизионидан жиддий чақириқларни қабул қилишга тайёрмиз.
"Golden Boy" промоутерлик компаниясининг жанглар ташкилотчилиги бўйича масъули Роберто Диас билан маслаҳатлашган ҳолда, 2021 йил охирига WBA ёки WBO йўналишида чемпионлик жангини мақсад қилганмиз. Aлбатта, барча каби бу йил бизда ҳам танаффус бўлди, аммо Бектемир ҳар доим юқори формани сақлади ва бўлғуси жангларда ундан ажойиб ғалабалар кутамиз", - деди Фролов.
Фикрлар