Боксчиларимиз ЖЧ олдидан Екатеринбургдаги ўқув-машғулот йиғинларида иштирок этишмоқда

Хабарингиз бор, 8 сентябрь куни Россия Федерациясининг Екатеринбург шаҳрида бокс бўйича жаҳон чемпионати старт олади. Ушбу нуфузли мусобақада ўзбекистонлик чарм қўлқоп усталари ҳам совринли ўринлар учун кураш олиб боришади. Юртдошларимиз мусобақада совринли ўринлар учун энг асосий даъвогарлардан бири ҳисобланишади.

Ўзбекистон бокс федерацияси мусобақада муносиб иштирок этиш мақсадида, жаҳон чемпионатига тайёргарликнинг энг сўнгги босқичини айнан ЖЧ ўтказиладиган Екатеринбург шаҳрида ташкил этди. Бу ҳақда ташкилот матбуот хизмати хабар бериб ўтди.

Ўқув-машғулот йиғинларида нафақат жаҳон чемпионатида иштирок этувчи боксчиларимиз, балки терма жамоамиздаги 2-3 рақамли чарм қўлқоп усталари ҳам қатнашишмоқда. 

Қайд этиш лозимки, ҳозирда Марат Қурбонов бошчилигидаги терма жамоа мураббийларидан ташқари боксчиларимизнинг шахсий мураббийлари ҳам Екатеринбургда бўлиб туришибди.