Дембеле аутсайдер жамоага ўтмоқчи

“Барселона” ҳужумкор футболчиси Усмон Дембеле Каталония клубидаги зиддиятлар кучайган бир пайтда ўзига янги иш жойи топди. Бу ҳақда таниқли журналист Фабрицио Романо хабар тарқатди.

Франциялик футболчи шартномаси охиригача “Барселона”да қолади. У негадир қишда жамоасини ўзгартиришни истамаяпти. Кейин эркин агент сифатида “Ньюкасл”га ўтмоқчи. Томонлар ўртасида оғзаки келишув бўлгани маълум.

Айрим мутахассис Дембеленинг ёзгача кутиши “Ньюкасл”нинг премьер-лигада жойини сақлаб қолиши билан боғлиқлигини айтмоқда. Табиийки, “қарғалар” қуйи лигага тушиб кетса, Дембеле даражасидаги юлдуз у ерга қадам босмайди.

Жароҳатларга мойил Дембеле жорий мавсумда Испания чемпионатида атиги олти марта майдонга тушиб, бир жуфт ассистни амалга оширди.