Драган Черан "Навбаҳор"га қарши ўйин, Суперлигадаги 100 та голи ва ОЧЛ олдидан қандай гапларни айтди?

“Пахтакор”нинг сербиялик ҳужумчиси Драган Черан Ўзбекистон чемпионатида ўзи учун ҳам шахсий натижаларини янада яхшилаб боряпти.

Амалдаги чемпион Суперлиганинг 4-турида Тошкентда Навбаҳор”ни қабул қилди. Ўта қийин кечган учрашувда айнан Черан беллашув охирларида рақиб дарвозасини ишғол қилиб жамоасига қимматли уч очкони тақдим этди. Аҳамиятлиси, Драган Суперлигада ўзининг 100-голини уришга муваффақ бўлди.

Жамоангда Черандек ҳужумчи бор эканми, демак, мураббий хотиржам тортади. Чунки у гол уришни қойиллатадиган ва ҳар томонлама жамоасига фойда келтиришни биладиган футболчи. Шунинг учун ҳам Черан охирги йилларда Ўзбекистонда тўп сураётган энг яхши легионер мақомини ўзида сақлаб келяпти.

Охирги йилларда чемпионатимизда ҳам энг яхши тўпурар мақомини ўзида сақлаб келаётган Драган бу йил ҳам гол уришни канда қилмаяпти. 4 та турдан кейин у 3 та гол билан яна тўпурарлар рўйхатида. Жамоа сафарга жўнаб кетиш олдидан тўпурар ҳужумчи Sports.uz учун интервью берди.

- Драган, аввало муҳим ўйиндаги ғалаба билан табриклайман. Ўйин ҳарорати баланд бўлди. Шундай муҳитни кутганмисиз?

- Ҳа, албатта, мен айнан шундай ўйинни кутгандим. “Навбаҳор” билан ўйин доимо қийин бўлган ва шунингдек сифатли футбол бўлади. Ушбу рақиб тажрибали мураббийга эга бўлган яхши жамоа ҳисобланади.

- Суперлигада 100-голингизни урдингиз. Бу статистикани билармидингиз? Айтайлик, биринчи голингиз ёдингиздами?

- “Навбаҳор” дарвозасига урган голим Суперлигадаги 100-голим бўлганини ўйиндан кейин билдим. Шубҳасиз, ажойиб натижа ва мен бундан хурсандман. Ўзбекистонда 100 та гол урган футболчилар аъзосига айланганимдан ҳам ғоят мамнунман. Рости, бундай натижага эришганимдан роҳатландим. Мана шундай натижага эришишимда менга ёрдам берган жамоадошларим ҳамда мураббийларимизга раҳмат айтаман. Биринчи голимми? Албатта, эслайман. Бу менинг “Насаф” таркибида “Шўртан”га қарши дастлабки ўйиним эди.

- ”Навбаҳор”га қарши ўйин якунида можаро юз берди ва буни аввало “Пахтакор” мухлиси бошлади. Ушбу вазиятга нима деган бўлардингиз?

- Буларнинг барчаси қизғин курашда юз берди. Кутилган натижага эришиш учун ҳар томонлама катта куч сарфланди. Юз берган вазият атрофида шов-шув кўтариш шарт эмас. Бу – футбол.

- 100 та голингиз орасида энг чиройлиси қайси?

- Гол урганингда ҳар бири ўзича чиройли ва ҳар бири жуда муҳим аҳамиятга эга бўлади, айниқса, ҳозирги вазиятда. Эҳтимол, “Локомотив”га қарши учрашувда парашют услубида киритган голим энг чиройлисидир...

- “Пахтакор” энди Осиё Чемпионлар лигасида ўйнайди. Сизнингча, гуруҳда фаворит ким?

- Бизнинг гуруҳимиз кучли. Шу билан бирга жуда қийин учрашувлар кутяпти. Ҳозирча фаворитлар йўқ. Чунки барчамиз бетараф майдондамиз. Шу боис гуруҳдаги ҳамма клубнинг имкониятлари тенг.

- Умуман айтганда, “Пахтакор” ОЧЛни ютишга қодирми?

- Ўзимизни кўрсатиш ва энг яхши жамоа эканлигимизни исботлаш учун қўлимиздан келган барча ишни қиламиз. Қандай даражадалигимизни кўриб оламиз.