Энрике: "Агар кимдир чемпионликка лойиқ бўлса, бу – ПСЖ"

31 май куни Мюнхенда бўлиб ўтадиган Чемпионлар лигаси финалида ПСЖ ва “Интер” жамоалари тўқнаш келади. Парижликлар устози Луис Энрике ҳал қилувчи баҳс олдидан жамоа ва мухлислар билан боғлиқ ҳиссиётларини баён этди.

“Энг аввало, биз босиб ўтган йўлдан ва мухлислар билан яратган алоқамиздан фахрланамиз. Бу алоҳида туйғу, мен учун жуда муҳим.

Бу ПСЖ тарихида мухлислар иштирокидаги илк Чемпионлар лигаси финали бўлади. Уларсиз бундай учрашув тўлиқ ҳис қилинмайди. Агар шунча йиллик инқироздан кейин кимдир ғалабага муносиб бўлса, бу айнан “Пари Сен-Жермен”.

Биламан, клуб мен туғилган йили ташкил топган. Умид қиламанки, бу боғланиш ўз исботини топади ва биз Чемпионлар лигасини юта оламиз!”

Энрикенинг таъкидлашича, бу финал жамоа учун нафақат соврин, балки мухлислар учун энг чиройли совға бўлади.

“Биз биринчи бўлишга ҳаракат қиламиз. Байрамлар келганда, одамларга ўз меҳнатимиз орқали совға улашишдан ёқимли нарса йўқ.

Бу финални “тортдаги гилос”га айлантиришга интилямиз. Жамоа ҳам, мухлислар ҳам буни муносиб кўради. Биз бу финалда ўйнаш имкониятини ҳалол топганмиз”, – деди испаниялик мутахассис.