Европага йўл очилмоқда: Олимпиадада порлаган футболчимиз легионерга айланади!
Қитъа ва жаҳон чемпионатлари, Олимпия ўйинлари каби юқори нуфузли халқаро мусобақалар иштирокчи спортчилар учун кўрик вазифасини ўтайди.
Кейинги йилларда халқаро майдонлардаги мусобақаларда ўз салоҳиятини намойиш эта олган футболчиларимиздан Абдуқодир Ҳусанов Франция, Муҳаммадали Ўринбоев Англия, Аббосбек Файзуллаев Россия, Ҳусниддин Алиқулов ва Азизбек Турғунбоев Туркия, Остон Ўрунов Эрон, Амирбек Саидов Сербия чемпионатларига йўл олди.
Энди хориж мамлакатларида легионер мақомида ўйнаётган ўзбек футболи тарбияланувчилари қаторига Алишер Одилов қўшилмоқда.
Ўзбекистон U-23 терма жамоаси сафида Қатардаги Осиё чемпионати ва Франция пойтахти Париждаги Олимпия ўйинларида иштирок этган истеъдодли ҳужумчимиз Россия Премьер-лигаси вакили “Химки” жамоасига кўчиб ўтадиган бўлди.
- Тез орада Алишер Одилов “Химки” сафида тиббий кўрикдан ўтиш учун Россияга учиб кетади. Унинг трансфери амалга ошиш арафасида, - деб маълумот тарқатди “Олимпик” жамоаси матбуот котиби Толибжон Қосимов.
23 ёшли Алишер Одилов аслида “Пахтакор” академияси тарбияланувчиси ҳисобланади. Истеъдодли ўйинчи бу йил Олимпия ўйинларида иштирок этган Ўзбекистон U-23 терма жамоасининг базаси ҳисобланган “Олимпик” жамоасига ўтказилган эди.
Клублар миқёсида бу ҳужумкор футболчи Ўзбекистон Суперлигасида жами 59 та учрашувда майдонга тушиб, 11 та гол ва тўртта ассист муаллифи бўлди.
Мамлакат кубоги мусобақаларида 14 та беллашувда ўз ҳисобига саккизта гол ва бешта голли узатма ёздириб қўйган.
Шунингдек, Одилов Ўзбекистон Про-лигасида ҳам иштирок этиб, тажрибасини оширган. Бу лигада 19 та баҳда ўнта гол ва олтита ассист қайд этиб, сермаҳсуллик намойиш қилган.
Алишер Одилов универсал ҳужумчи ҳисобланади. Унинг асосий позицияси ўнг қанот ҳужумчиси бўлишига қарамай, чап қанотда, ҳужум марказида ва майдон марказида самарали ўйин кўрсата олади.
Ўзбек футболининг иқтидорли вакили Ўзбекистон U-23 терма жамоаси таркибида халқаро миқёсдаги учрашувларда 27 маротаба майдонга тушиб, рақиблар дарвозасини 12 марта ишғол қилишга муваффақ бўлди.
Шунга қарамай, Алишер Париж Олимпиадасида иштирок этадиган терма жамоанинг якуний таркибидан тушиб қолди. Бироқ Испанияга қарши ўтказилган биринчи учрашувдан кейин “Қайрат”дан таклиф қилинган Иброҳимхалил Йўлдошев Тошкентга қайтиб келишга мажбур бўлиб қолади.
Терма жамоа мураббийлар штаби белгиланган қоидалардан фойдаланган ҳолда Иброҳимхалил Йўлдошев ўрнига айнан Алишер Одиловни Францияга чақиртиради.
Ҳужумчи ўзига билдирилган ишончни оқлади. Ўзбекистон олимпия терма жамоаси сафида иккинчи турда Мисрга қарши олти дақиқа ўйнаган ҳужумчига гуруҳдаги охирги баҳсда катта имконият берилди.
Доминикан Республикаси терма жамоаси билан бўлган баҳсни илк дақиқаларда бошлаган Алишер Одилов терма жамоа сардори Элдор Шомуродовнинг пасини голга айлантириб, терма жамоамизнинг дуранг натижасини таъминлади.
Энди 23 ёшли футболчимиз ўз маҳоратини Россия Премьер-лигасида намойиш этиши лозим. Алишер Одилов “Химки” қўшилиши билан бу лигадаги легионерларимиз сони бештага етади. Алишердан ташқари Аббосбек Файзуллаев ЦСКАда, Шерзод Эсонов "Акрон"да, Умарали Раҳмоналиев ва Рустамжон Ашурматов “Рубин”да тўп тепиб келмоқда.
Комментарии