Файзуллаев Европага кетишга тайёрланяпти!
Август ойида “Пахтакор”дан Москванинг ЦСКА клубига кўчиб ўтган 19 ёшли Аббосбек Файзуллаев Россия Премьер-лигасининг ҳақиқий кашфиёти бўлди.
Тобора ўзбек футболчисининг истеъдоди ва салоҳияти ҳақида ўз фикр-мулоҳазасини билдираётган мутахассислар сони ортиб боряпти. Россиядаги таниқли футбол экспертларидан бири Александр Тильман ҳам ҳамюртимиз ҳақида ўз қарашларини айтиб ўтди.
- ЦСКАдаги Файзуллаев каби тана тузулишига эга ўйинчиларнинг бизнинг лигамизда муваффақиятли ўйнай олишига кўпинчи шубҳа билан қарашга одатланганмиз. Россия Премьер-лигаси футболчидан жисмоний қувват ва атлетизмни талаб қилади, деган тушунча пайдо бўлиб қолган.
Мана ҳозир бўйи баланд бўлмаган, жисмонан ихчам, бироқ тезкор, мувозанатни яхши сақлай оладиган техникаси зўр йигит пайдо бўлди. Аббос курашдан мутлақо қочмаяпти, қўрқмай яккама-якка курашларга киришяпти уряпти, гавдаси кичиклигига қарамай, ўзини курашга уряпти ва уларда ютиб чиқяпти.
Файзуллаев қўрқмас ва техникаси зўр ўйинчи экани унинг ютуғи ва бу омиллар уни чемпионатимизнинг ёрқин футболчисига айлантирди.
Аббоснинг ёши ва футболчилик сифатлари, шунингдек, Ўзбекистон миллий терма жамоаси аъзоси эканидан келиб чиқиб, келажакда маҳорати ва трансфер суммаси янада ошишига салоҳияти ва имкониятлари етарлидир.
Шу ўринда, ЦСКА бу ўйинчини олиб, катта таваккал қилишдан қўрқмаганини таъкидлаш керак. Бугунги кунда Файзуллаев ўз ўйини билан бу трансферни ортиғи билан оқлаяпти, - деди Александр Тильман.
Ўзбекистонлик мухлислар Аббосбек Файзуллаевдан Элдор Шомуродовнинг йўлини такрорлаб, Россия Премьер-лигасининг кучли бешлик чемпионатларидан бирига ўтиб кетишини кутяпти. Ўгҳн тўққиз ёшли ҳужумкор футболчининг ўзи ҳам топ-лигаларда ўйнаш истаги борлигини яшираётгани йўқ.
Аббосбек Россиядаги фаолияти орқали Европага кетишга тайёргарлик кўряпти, десак ҳеч қандай муболаға бўлмайди.
Аслида бу тайёргарликлар анча аввал бошланган. Аббосни яхши биладиган манбаларнинг маълум қилишича, истеъдодли футболчимиз футболдаги маҳоратини чарҳлаш билан бирга тил ўрганишга ҳам алоҳида эътибор қаратган экан.
Файзуллаев ўзбек тилидан ташқари, ҳозир рус, инглиз ва испан тилларида эркин мулоқот қила олади. Хорижий тилларни билиш майдонда турли мамлакат вакиллари билан бирга тўп тепганда жуда қўл келишига мисоллар жуда кўп.
Қолаверса, яқинда Аббосбек Файзуллаевнинг биринчи мураббийи Дмитрий Ан шогирдининг ўйин услуби Испания чемпионатига жуда мос тушиши ва у Ла Лигада ўзини кўрсата олишини алоҳида таъкидлаган эди.
Ким билсин, Элдор Шомуродов Италияга, Абдуқодир Ҳусанов Францияга борганидек, эрта-индин Аббосбек Файзуллаев ҳам орзусини амалга ошириб, Европага, хусусан, Испанияга йўл олиши мумкин.
Фикрлар
ктухтама биз сенга ишонамиз