Легионерларимиз тарихий чемпионлик остонасида
Ўзбекистонлик футбол ишқибозлари Қозоғистон Премьер-лигасида “Ордабаси” жамоасига мухлислик қилмоқда. Бунга сабаб Чимкент жамоаси сафида Ўзбекистон миллий терма жамоасига икки номзод – Бобур Абдухолиқов ва Шаҳбоз Умаров тўп тепмоқда.
Ҳар икки вакилимизнинг “Ордабаси”нинг етакчи ўйинчиларидан ҳисобланади ва ушбу клубни тарихда илк бор Қозоғистон чемпионлигини қўлга киритиши йўлида жамоага ёрдам беряпти.
Қозоғистон Премьер-лигасида 14 та жамоа ўзаро рақобатлашяпти. Умумий ўйинлар сони 26 тани ташкил қилади. Ҳозир чемпионат ҳал қилувчи паллага кирган.
24-турда бир неча эътиборга молик учрашувлар бўлди.
Мусобақада пешқадамлик қилаётган “Ордабаси” футболчилари Толдиқўрғонда “Жеттису” жамоаси меҳмони бўлди. Чимкентликлар мезбонларнинг жиддий қаршилигига дуч келди. Шунга қарамай, иккинчи бўлимда Артём Беседин ва Темирлан Ерлановнинг голлари меҳмонларга 2:1 ҳисобида ғалаба келтирди. “Жеттису”нинг ягона жавоб голига Илёс Амирсаитов муаллифлик қилди.
Бу учрашувда Бобур Абдухолиқов бошланғич таркибда майдонга тушди ва 67-дақиқада захирага олинди. Шаҳбоз Умаров эса, захирадан майдонга тушиб, йигирма дақиқадан кўпроқ ҳаракат қилди.
Сафардаги ўйиндан ғалаба билан ортга қайтган “Ордабаси” очколари сонини 55 тага етказиб олди ва пешқадамликни мустаҳкамалади.
Турнинг марказий учрашуви иккинчи ўринда бораётган “Астана” ва учинчи поғонадан ўрин олган “Актобе” жамоалари ўртасида кечди. “Актобе” ўз мухлислари кўз ўнгида пойтахтликлар дарвозасини икки бор ишғол қилиб, уч очкони қўлга киритди.
Бу ғалабадан кейин “Актобе” ўзидан бир поғона юқорида турган “Астана”дан атиги бир очкога ортда қолмоқда. Ҳар икки жамоа сўнгги тургача кумуш медаль учун курашадиган бўляпти.
Таъкидлаш жоизки, “Актобе” ва “Астана” ўртасидаги ўйин натижаси кўпроқ “Ордабаси” фойдасига ишлади. Энг яқин таъқибчи – “Астана” мағлубиятдан кейин чемпионат якунланишига икки тур қолганида чимкентликлардан олти очкога ортда қолмоқда.
Энди легионерларимиз жамоаси қолган икки турда битта ғалаба қозонса ҳам, чемпионат олтин медалларига эга чиқади. Кейинги рақиблар ҳам унчалик кучли эмас. “Ордабаси” 21 октябрь куни мусобақа жадвалида 10-ўринда бораётган “Шахтёр”ни қабул қилади ва айнан мана шу учрашувда чемпионликни расмийлаштиришга уриниб кўради. Сўнгги ўйин эса, 28 октябрда Премьер-лигани тарк аниқ бўлиб улгурган “Каспий” қарши рақиб майдонида бўлиши белгиланган.
Премьер-лиганинг бу мавсумида “Каспий” билан бирга “Аксу” жамоаси қуйи лигага тушиб кетгани муддатидан олдин аниқланди.
“Ордабаси”ни чемпионликка етаклаётган легионерларимиздан Бобур Абдухолиқов мавсумнинг барча учрашувида майдонга тушган ягона футболчи ҳисобланади. Ҳужумчимиз бу ўйинларда рақиблар дарвозасини етти маротаба ишғол қилди ва жамоадошларига учта голли пас узатди.
Шаҳбоз Умаров эса, Премьер-лиганинг 20 та беллашувида иштирок этиб, иккита гол ва битта ассист муаллифи бўлди.
Легионерларимиздан ютуқлари сирасига Қозоғистон Премьер-лигаси чемпионлигини қўшиб қўйишларини умид қилиб қоламиз!
Фикрлар