Файзуллаевнинг устози шогирди қайси лигага боришини айтди
Ўзбекистон футболининг энг ёрқин тарбияланувчиларидан Аббосбек Файзуллаевнинг Европанинг кучли лигалардан бирига ўтиши кейинги йилларда мухлису мутахассислар диққат марказида турган масалалардан бирига айланиб қолди.
“Пахтакор”да порлай бошлаган ҳужумкор футболчимиз 2023 йилнинг августида ЦСКАга трансфер қилинганидан кейин Россия майдонларида ҳам ўзини кўрсатиб, Премьер-лиганинг ҳақиқий кашфиёти бўлди ва ҳар қандай лигада ўйнай олиш қобилиятини намойиш қилди.
Элдор Шомуродовнинг “топ-5” лигаларидан Италия чемпионатида ўйнаётган ва айниқса, Абдуқодир Ҳусановнинг “Манчестер Сити”га зўр киришиб кетгани ўзбек футболчиларига бўлган эътиборни кучайишига туртки бўлмоқда.
2025 йилнинг ёзги трансферлар бозори яқинлашгани сари Аббосбек Файзуллаевнинг трансферига оид маълумотлар оқимини ҳам кўпайиб бориши табиий ҳол. Бу жараён Туркия Суперлигаси пешқадами “Галатасарой”нинг Аббосбек Файзуллаевга жиддий қизиқиш билдираётгани билан бошланди. Ҳали мавсум охиригача бошқа даъвогарлар пайдо бўлиши ҳам кутилмоқда.
Аббосбек Файзуллаевнинг биринчи мураббий Дмитрий Ан шогирдининг қайси лигада ўйнамоқчи эканига ойдинлик киритиб ўтди.
- Тўғрисини айтсам, яқинда бу масалани Аббосбек Файзуллаев билан гаплашган эдик. У Испанияга боришни хоҳлаяпти. Файзуллаевнинг Ла Лигада ўйнаш иштиёқи жуда кучли.
“Галатасарой” – Туркиянинг амалдаги чемпиони. Бу ҳам Аббос учун яхши вариант.
Бироқ бу масалани, яъни Аббос жамоага керак бўладими ёки уни қўйиб юбориш мумкинми, буни ЦСКА раҳбарияти ҳал қилади.
Таклифлар бор экан, мен Аббос учун хурсандман. Унинг орзуси рўёбга чиқишини истайман. Испанияда қандай ривожланишини кўриш насиб қилсин, - деди Дмитрий Ан.
Москва клуби ўзбек футболчисини 500 минг евро эвазига қўлга киритгани қайд этилган. Айни пайтда Файзуллаев “армиячилар”нинг энг қимматбаҳо активларидан ҳисобланади.
Россия Премьер-лигасидаги ёрқин ўйинлари ортидан қисқа фурсатда легионеримизнинг трансфер суммаси кескин кўтарилди. Айни пайтда Аббос ЦСКАнинг энг қимматбаҳо уч ўйинчисидан бири ҳисобланади. Transfermarkt портали экспертлари томонидан “армиячилар” орасида Иван Обляков энг қиммат – 9 миллион еврога баҳоланган. Кейинги ўринлардаги Аббосбек Файзуллаев ва Игорь Дивеевнинг трансфер нархи 8 миллион еврони ташкил қилмоқда.
Аббосбек Файзуллаев профессионал футболчилик фаолияти давомида “Пахтакор” сафида 41 та учрашувда иштирок этиб, ўз ҳисобига ўнта гол ва учта ассист ёздириб қўйган.
ЦСКАга кўчиб ўтганидан бери 21 ёшли легионеримиз 59 та беллашувда иштирок этиб, рақиблар дарвозасини саккиз маротаба ишғол қилди ва жамоадошларига 21 та голли пас узатди.
Файзуллаев 2023 йилнинг ёзидан бери Ўзбекистон миллий терма жамоаси ўйинларига жалб этиб келинади. Халқаро майдонда ҳужумкор футболчимиз 25 та баҳсда майдонга тушди, Тожикистон, Қирғизистон, Ҳиндистон, Таиланд, Қатар, Шимолий Корея ва Эрон дарвозаларига жами саккизта гол урди ва иккита голли пас узатди.
Ҳамюртимизнинг ЦСКА клуби билан имзоланган амалдаги шартномаси 2026 йилнинг 30 июнига қадар давом этиши белгилаб қўйилган.
Экспертлар ўйини қовушмаган Ҳусановни қандай баҳолади?
ЦСКА ва Файзуллаев Европадан бўлаётган қизиқишга қандай жавоб берди?
Легионеримиз – “Реал”га гол уриб ҳам ишсиз қолиш мумкин...
Бош мураббий Файзуллаев нечта гол уришини айтди
Комментарии