Флик: “Барса”да ҳеч қачон ҳафсалимни пир қилмайдиган битта ўйинчи бор

Испаниянинг амалдаги чемпиони “Барселона”нинг германиялик бош мураббийи Ханс-Дитер Флик ҳозирги таркибда тўлиқ ишонч билдириши мумкин бўлган бир ўйинчи борлигини айтди.

- Жерар Мартин ҳеч қачон ҳафсаламни пир қилмайди. Майдонда ҳар гал борини бериб ўйнайди. Ўйиндан ўйинга очилиб боряпти. Айниқса, муҳим учрашувларда зўр ҳаракат қилмоқда.

Мартин икки йил аввал “Барселона”нинг иккинчи жамоасида ўйнаб юрганидаёқ эътиборимизни тортган эди. У жуда меҳнаткаш ва ақлли йигит, - деди Ханс-Дитер Флик.  

23 ёшли Жерар футбол сир-асрорларини “Корнеля” академиясида ўрганган. Иқтидорли ҳимоячи 2023 йили “Барселона”нинг иккинчи жамоасига кўчиб ўтди. Бир йил муқаддам Каталония клуби уни асосий таркибга қабул қилди.

Жерар Мартин аслида чап қанот ҳимоячиси ҳисобланади. Зарурат бўлган паллаларда ҳимоя марказида ҳам муваффақиятли ўйнай олади. Унинг клуб билан шартномаси 2028 йилнинг ёзигача давом этади.