ФР: Холанднинг кичик мундиалдаги катта рекорди

21 май куни Аргентинада 20 ёшгача бўлган футболчилар ўртасида 23-жаҳон чемпионати старт олади. Равшан Ҳайдаров шогирдлари ҳам иштирок этадиган мусобақа ҳақида қизиқарли фактларни келтирамиз.

1) Турнирда барчадан кўпроқ қатнашган жамоа Бразилия ҳисобланади. Бошланаётган чемпионат Лотин Америкаси вакиллари учун 19-сидир. Қитаъдошларимиздан бу борада энг тажрибалиси Жанубий Корея термаси бўлиб турибди (16).

2) Мусобақани ютиш бўйича турнирнинг бу йилги мезбони ҳаммадан олдинда. Аргентиналиклар 6 бор U-20 Жаҳон чемпионати шоҳсупасига кўтарилишган.

Осиё жамоаларида ҳозирча чемпионлик унвони йўқ. Аммо 3 қитъадошимиз мусобақа финалида иштирок этган. Булар: Қатар (1981), Япония (1999) ва Жанубий Корея (2019).

3) Турнирнинг энг яхши футболчисига бериладиган "Олтин тўп"ни қўлга киритиш бўйича бразилияликлар етакчи (5 марта). Қитъадошларимиздан фақат 2 ўйинчи бу совринга эришган: Исмоил Матар (2003) ҳамда Канг-Ин Ли (2019).

4) Фақат 3 нафар футболчи ушбу мусобақада 2 мартадан ғалаба қозонган. Улардан бири аргентиналик Серхио Агуэро ҳисобланади (2005, 2007).

5) Турнирнинг финал босқичида қайд этилган энг йирик ҳисоб 2019 йилга тўғри келади. Ўшанда норвегияликлар Гондурас дарвозасига жавобсиз 12та тўп киритишган эди.

6) Бир ўйинда киритилган голлар сони бўйича мутлақ рекорд бугун АПЛни "ёндираётган" Холандга тегишли. Эрлинг биз юқорида эслаган ўйинда 9та гол уриб, мусобақа "бомбардир"ига айланган эди.

7) Чемпионат давомида урилган голлар сони бўйича рекорд эса аргентиналик Хавьер Савиолага тегишли. Кейинчалик "Барселона" ва "Реал" шарафини ҳимоя қилган ҳужумчи 2001 йил ўз ватанида ўтказилган мусобақада номини 11 бор таблога ёздиришни уддалаган...

Фахриддин Рўзиев