Гвардиола Ҳусановнинг ўйинига қандай муносабат билдирди?
Англия Премьер-лигасининг 28-турини “Ноттингем Форест” ва “Манчестер Сити” ўйини бошлаб берди. Бу икки жамоа мусобақа жадвалида кетма-кет жойлашгани боис, мезбонлардан бир очко ортда қолаётган “шаҳарликлар”да учинчи ўринга кўтарилиб олиш имкониятини берарди.
Шу боис, Хосеп Гвардиола шогирдлари илк дақиқалардан ғалаба учун ўйнади. Ўз навбатида, “ўрмончилар” анъанавий кучли клублар қаторига кирмаса-да, жорий мавсум бежизга лига рейтингида фақат “Ливерпуль” ва “Арсенал”дан кейинги поғонада бормаётганини кўрсатди.
“Манчестер Сити” ҳимоя чизиғи ўйин давомида фақат бир марта панд берди ва рақиб ҳужумчиси Каллум Хадсон-Одои бундан фойдаланиб, Эдерсонни ожиз қолдирди. Бразилиялик дарвозабон яқин бурчагидан тўп ўтказиб юборгани учун ҳам мағлубият учун жавобгарликни ўз зиммасига олиши керак.
Хосеп Гвардиола жамоаси жорий мавсумда чемпионатдаги тўққизинчи мағлубиятини қабул қилиб олди. Лекин испаниялик мутахассис “Сити Граунд” аренасида асосий рақобатчиларидан бирига имкониятни бой берганига қарамай жамоасининг ўйинидан мамнун эканини билдирди.
Бироқ бу хотиржамликка бериладиган ҳолат эмас. Агар “Челси” 9 март куни бўладиган беллашувда “Стэмфорд Бридж”да “Лестер Сити”ни мағлуб эта олса, “шаҳарликлар” кучли тўртликдаги ўрнини “аристократлар”га бўшатиб беради. “Ўрмончилар” эса, манчестерликлар билан ўртадаги фарқни тўрт очкога етказиб, анча бамайлихотир бўлиб олди.
“Манчестер Сити” ўтган йили қўлга киритилган Англия чемпионлиги бу йил “Ливерпуль”га топширади. Ягона умид Англия кубогини қўлга киритиб, мавсум битта бўлса ҳам соврин билан якунлашдан иборат.
Экспертлар “Манчестер Сити” январь ойида 181,5 миллион фунт эвазига амалга оширган трансферлар жамоа ўйинига ижобий таъсир кўрсата бошлаганини эътироф этмоқда. Айниқса, тўрт нафар янги ижрочи орасида Абдуқодир Ҳусановнинг трансфери жуда муваффақиятли чиқди.
Хосеп Гвардиола “Ноттингем Форест”га қарши ўтган учрашувда улардан икки нафари – Абдуқодир Ҳусанов ва Нико Гонсалесни илк дақиқалардан ўйнатди. Ўзбек легионери яна мухлису мутахассислар ишончини оқлаб, тўпни олиб қўйиш, рақиб ҳужумларини тўхтатиш, пасларини кесиб қўйиш, узоқ масофаларга аниқ тўп ошириш, яккакурашлардаги устунлик билан ўзини кўрсатди. Ҳусанов рақиб ҳужумчилари – Каллум Хадсон-Одои ва Крис Вуднинг дарвозага хавф солишига умумун йўл бергани йўқ.
Хосеп Гвардиола Натан Аке, Жон Стоунз, Мануэль Аканжи сингари етакчи марказий ҳимоячиларнинг йўқлигида кучли рақибга қарши Ҳусанов ва Рубен Диас жуда яхши ўйнаганини алоҳида эътироф этди ва мақтади.
- Биз ҳимоя марказида ҳақиқатан жуда яхши ўйнадик. Ҳозир бошқа марказий ҳимоячиларимиз йўқ. Айниқса, Абдуқодир Ҳусанов зўр ҳаракат қилди, шунингдек, Рубен Диас ҳам. Биз ўз дарвозамиз олдида хавфли вазиятлар кўпайишига йўл қўймадик. Ҳимояланишда футболчиларимиз ўзини кўрсата олди. Беллашув кучли босим остида ўтди, - деди Хосеп Гвардиола.
Жорий йилнинг 20 январь куни “Ланс”дан “Манчестер Сити”га кўчиб ўтган Абдуқодир Ҳусанов Англия Премьер-лигаси, мамлакат кубоги ва Европа Чемпионлар лигасида еттита учрашув ўтказиб, битта гол уришга ҳам эришди. Бу баҳсларнинг деярли барчасида легионеримиз “Манчестер Сити”нинг фаол ўйинчиларидан бўлди.
Фикрлар