Ҳусановнинг Франциядаги трансфери қандай баҳоланди?

Франция чемпионатида ҳам қисқа муддатли танаффус эълон қилингани боис футбол экспертлари мавсумнинг биринчи қисмини таҳлил қилиш билан банд.

Нуфузли манбалардан бири - le11hdf.fr сайти эксперти Ромен Пешон “Ланс” жамоасининг ёзги трансферлар орасида энг муваффақиятли бўлган ўйинчилар ҳақида тўхталди.

Умуман олганда, лансликлар янги мавсум олдидан саккиз нафар футболчининг трансферига харажат қилди. Клубга энг қиммат тушган ўйинчи Элье Вахи бўлди. “Монпелье” ҳужумчисини олиш учун 30 миллион евро керак бўлди.

Энг арзон трансфер – Абдуқодир Ҳусанов. Ўзбек футболчиси учун французлар Беларуснинг “Энергетик-БГУ” жамоаси ҳисобига 100 минг евро ўтказиб берди. Ҳимояни мустаҳкам ушлаб турган Ҳусанов кетганидан кейин минсклик талабалар Беларус чемпионати олий лигасидан тушиб кетди.

Ромен Пешон “Ланс”га ёзда келган чарм тўп усталари орасидан тўрт нафарининг дебюти муваффақиятли чиққанини таъкидлади.

Рубен Агилар

Ребун “Монако”да ўйин амалиётисиз қолиб кетган эди. “Ланс”га ўтиб тўғри қарор қабул қилди. 3,5 миллион еврога харид қилинган ўнг қанот ҳимоячиси Европа Чемпионлар лигасида кам ўйнаган бўлса-да, миллий чемпионатда 1041 дақиқа тўп тепди.

Мураббийлар штабига бу футболчининг самарадорлиги маъқул келди. Рубен ҳимояни мустаҳкам ушлаш баробарида ҳужумдаги жамоадошларига учта ўткир пас берди. Ўз қанотида ҳужумчи  Флориан Сотока билан ҳамжиҳатликда ўйнаяпти.

Нил Ал-Айнауи

Ёзда “Нанси”дан 600 минг еврога олиб келинган футболчидан бошида ҳеч ким катта натижаларни кутгани йўқ. “Ланс”га киришиб кетишига бешта учрашувдан иборат дисквалификацияси ҳам тўсқинлик қила олгани йўқ. 22 ёшли футболчи янги жамоасида голлар ҳисобини очишга ҳам улгурди.

Абдуқодир Ҳусанов

“Ланс” мураббийлар штаби ёш футболчини марказий ҳимоя ротациясида тўртинчи ёки бешинчи ўйинчи сифатида қабул қилаётган эди. Бироқ, бош мураббий Франк Хейз бешинчи турда Ҳусановни бошланғич таркибда майдонга туширишига тўғри келди.

Абдуқодир ўзи қатнашган учрашувларда ёш бўлишига қарамай, етук футболчилардек ўйнади. 19 ёшли ҳимоячи клуб раҳбарияти ва мухлисларига катта салоҳият эгаси сифатида умид беряпти. Айни пайтда ўзбек футболчиси жамоанинг энг салоҳиятли топилмаларидан бири бўлиб турибди.

Ҳусанов Франция чемпионати ва Европа Чемпионлар лигасида жами саккизта ўйинда қатнашди ва умумий ҳисобда 439 дақиқадан кўпроқ ўйнади. Легионеримиз лигада “Мец”, “Лилль”, “Клермон”, “Реймс” ва “Ницца”га қарши баҳсларни бошланғич таркибда бошлади ва улардан учтасини тўлиқ ўтказди. 15-турда “Монпелье” майдонида кечган беллашувда 65-дақиқада захирадан ўйинга қўшилди.

Абдуқодир Ҳусанов Чемпионлар лигаси гуруҳ босқичида “Арсенал” ва “Севилья” билан ўйинларда иштирок этди.

Нампалис Менди

Мавсум бошида “Тулуза” ижарадаги футболчиси Стийн Спиерингсни “Ланс”дан қайтариб олганидан кейин Франк Хейз эътиборини Нампалис Мендига қаратди.  Сенегал терма жамоасининг 31 ёшли футболчиси “Лестер”даги фаолиятини тугатиб, жамоасиз қолганди. Менди “Ланс”га келиб, жамоа етакчиларидан Секо Фофананинг кетиши ортидан анча заифлашиб қолган ярим ҳимояни мустаҳкамлашга эришди.

Шу тариқа, Нампалис Менди Франция вице-чемпиони учун қутқарувчи ролини ўйнаётган футболчига айланди.

Ниҳоят, Файзуллаев мухлислар ва мутахассисларга мурожаат йўллади

Шомуродов йўқ, Ўзбекистоннинг Осиё кубогидаги энг хавфли футболчиси ким?

Ўзбекистоннинг Осиё кубогидаги рақиби Сурия Россиядан Файзуллаевни яхши биладиган футболчини чақирди!