Ҳусановнинг тарихий дебюти Англияда қандай баҳоланди?
Абдуқодир Ҳусанов “Манчестер Сити”нинг асосий таркиб ўйинчисига айланиб бормоқда. 20 январь куни “шаҳарликлар” жамоасига қўшилган легионеримиз қисқа фурсатда учта нуфузли мусобақа – Англия Премьер-лигаси, Англия кубоги ва Европа Чемпионлар лигасидаги дебютини ўтказиб бўлди.
Мадридда “Реал”га қарши майдонга тушган ҳамюртимиз тарихий натижа қайд этди. Ҳусанов Чемпионлар лигаси плей-офф босқичида “Реал”га қарши “Сантьяго Бернабеу” стадионидаги ўйинда дебютини ўтказган иккинчи энг ёш ўйинчи бўлди. Беллашув ўтказилган санада легионеримиз 20 ёшу 356 кунлик эди.
Тўғрисини айтганда, “Манчестер Сити”нинг “Реал”га кучи етмади. Буни Хосеп Гвардиола ҳам тан олди. Абдуқодир мадридликларга қарши ўз даражасида ўйнади, ўзини ҳам, мураббийларни ҳам уялтиргани йўқ.
Нуфузли манбалардан бири – cityxtra.co.uk сайти экспертларининг “Манчестер Сити” футболчилари ҳаракатларига қўйган баҳолари ҳам шундан далолат беради. Ҳусанов аксарият жамоадошларидан яхши ўйнади.
Эдерсон – 4,5
Ўйинда “Реал” катта устунлик қилганига қарамай, Эдерсон дарвозасига кўп ҳам зарба йўллангани йўқ. Шу куни Мбаппени ҳеч ким тўхтата олмади ва ҳамма голларда ҳам дарвозабонни айблаб бўлмайди.
Абдуқодир Ҳусанов – 4
Учрашувдаги биринчи тўқнашувда Винисиус Жуниор ундан ўтиб кетганидан кейин Абдуқодир қолган пайт диққат ва эътибор билан ўйнади. Мадридликлар Ҳусанов ўйнаган позицияга жуда кўп босим уюштирди. Мағлубиятга эса, бутун жамоанинг яхши ўйнай олмагани сабаб бўлди.
Рубен Диас – 5
Ўйин кўнгилдагидек бошланмади. Мбаппе унга дарров босим ўтказди, Диас етарли даражада қаршилик кўрсата олмади. Қолган дақиқаларда Рубен рақибга қарши жуда ишончли ўйнади.
Йошко Гвардиол – 3,5
Ўз даражасида ўйнай олмади. Тажрибали ҳимоячи иккинчи гол урилган вазиятда Килиан Мбаппега халақит қила олмади.
Нико – 3,5
Бу учрашув Никога “Манчестер Сити”да ўйнаш учун қандай темпни ўзлаштириши кераклигини кўрсатиб қўйди.
Илкай Гюндоған – 3,5
Аввалги мавсумларда “Манчестер Сити”нинг устунлигини таъминлаб келган тажрибали ярим ҳимоячининг бу гал қўлидан ҳеч нарса келмади.
Бернарду Силва – 3
“Сити”га тўпни назорат қилишдаги устунликни олиб беришга уриниб кўрди. Амалда эса, ўйинни “Реал” бошқарди.
Фил Фоден – 3
Ўйинга киришиб кета олгани йўқ. Мбаппе хет-трик қилган вазиятда Фодендан осонликча ўтиб кетди.
Омар Мармуш – 3,5
Мармуш катта ўйинларда марказий ҳужумчи қандай қаршиликларга дус келишини илк бор ўзида ҳис қилиб кўрди. Мадридликлар унга умуман имкон бермади.
Савиньо – 4
“Манчестер Сити” либосида илк бор марказий ҳудудда ўйнади. Унга қанотларда юргани маъқул экан.
Натан Аке – 4
Бу футболчи ҳам тўпни қайтаришда анча асабийлашди. Мбаппени тўхтатишда Фоденга ёрдам беришига тўғри келди.
Матео Ковачич – 4,5
Яхши ўйнади. Асосан узоқ масофадан йўллаган зарбаси билан эсда қолди.
Жеймс МакЭти – 5
Захирадан майдонга тушиб, жамоаси ўйинини жонлантирди. Аниқ пас билан рақиб ҳимоясига босим ўтказишга ҳаракат қилди.
Ҳусановнинг номи “Реал” ва Европа Чемпионлар лигаси тарихига ёзилди
Ҳусановнинг “Сити”даги келажагига ойдинлик киритилди
Файзуллаев Европага қачон кетишини айтди!
Фикрлар