Ибрагимович: Златан - Европа лигасида ўйнайдиган футболчи эмас

Швециялик ҳужумчи Златан Ибрагимович ўзининг “Милан”даги келажаги ҳақида гапирди.

Айтиш керакки, 38 ёшли футболчининг “россонерилар” билан амалдаги шартномаси жорий мавсум сўнггида ўз ниҳоясига етади.

“Златан футбол ўйнаш учун туғилган ва у ҳали ҳам энг яхши. Кўп нарса яқин икки ойда ўзимни қандай ҳис қилишимга боғлиқ. Бундан ташқари, клуб билан нималар содир бўлишини ҳам кўрамиз. Агар бу ҳолат давом этса, янги мавсумда мени бу ерда кўрмайсизлар. Ибрагимович – Европа лигасида ўйнайдиган футболчи эмас ва “Милан” ҳам бундай даражадаги турнирга мос клуб эмас”, - дейди футболчи.

“Милан” айни дамда 49 очко билан 7-ўринда бормоқда. ЕЧЛга йўлланма берувчи сўнгги 4-поғонада эса 65 очко тўплаган “Интер” бормоқда.

Матнда хатолик топсангиз, ўша хатони белгилаб, бизга жўнатинг (Ctrl + Enter)