“Интер” икки юлдузидан бирини сотишга мажбур

Коронавирус пандемияси оқибатида юзага келган вазият “Интер”нинг молиявий имкониятларини ҳам чегаралаб бормоқда. Миланликлар мураккаб вазиятдан чиқиш учун икки юлдуз – Ромелу Лукаку ва Лаутаро Мартинесдан бирини сотишига тўғри келади.

“Интер” учун Ромелу Лукакуни сотиш катта фойда келтиради. Чунки 27 ёшли тўпурар хизматига “Челси”, “Манчестер Сити”, ПСЖ”, “Реал”, “Барселона” каби клублар жиддий қизиқиш билдирмоқда. Миланликлар таркибида 62 та учрашувда 42 та гол урган футболчининг трансферидан 70-80 миллион евро ишлаб олиш мумкин.

“Интер” ўтган ёзда ҳам Лаутаро Мартинеснинг трансферидан даромад олиши мумкин эди. Бироқ, аргентиналик юлдузни 111 миллион еврога баҳолаган клуб раҳбарияти “Барселона”нинг бир неча таклифини рад этди. Бу ёзда эса Мартинеснинг бозори ҳам қизийди.

Жамоа бош мураббийи Антонио Конте икки ҳужумчидан бири кетадиган бўлса, уларнинг ўрнини ёзда эркин агентга айланадиган “Манчестер Сити” тарихидаги энг зўр тўпурар Серхио Агуэро билан тўлдиришни мўлжалламоқда.