Ислом Тўхтахўжаев: Хитойдаги вазият яхши томонга ўзгарган

Хитойда ҳаёт аста-секин изига тушмоқда. Натижада футбол жамоалари ҳам аллақачон мавсумга тайёргарлик бўйича машғулотларини бошлаб юборишган. Шундай экан, хорижлик легионерлар ҳам Чин юртига қайтишди.

Хабарингиз бор, у ерда фаолият олиб бораётган ҳамюртларимиз ҳам ўз клубларига етиб боришган. Масалан, Самвел Бабаян ва Одил Аҳмедов бир неча кун олдин ўз жамоаларининг ихтиёрига етиб келишганди.

Шунингдек, у ерда яна бир ҳамюртимиз дебют мавсумини ўтказишидан хабарингиз бор. Маҳаллий “Шенянг Урбан” жамоасининг аъзосига айланган фарғоналик ҳимоячи Ислом Тўхтахўжаев ҳам айни пайтда ўз клубининг машғулотларида иштирок этмоқда. Айниқса, у ерда карантин бекор қилингач, чемпионат давом эттирилиши кутилмоқда. Ўз ўрнида Тўхтахўжаев у ердаги ҳаёт ва янги жамоаси ҳақида шундай деди:

- Бу ерга келганимга бир ойдан ошди. Вазият анча яхши томонга ўзгарган. Биз ҳозирда Дальян шаҳридамиз. Метро, кафе ва бошқа масканлар аста-секин очиляпти. Аммо чемпионат қачондан бошланишини ҳали аниқ билмайман. Шунга қарамай, биз жамоамиз билан астойдил шуғулланяпмиз. Кунига икки маҳалдан машғулот ўтказяпмиз ва ҳаммаси яхши. У ердаги кўп жойларда одамлар энди ниқобсиз юришяпти. Ҳозирча жамоамиздаги ҳамма футболчилар ҳали келиб улгуришгани йўқ. Аммо муҳит жуда ажойиб. Айни пайтдаги эътибор эса футболчиларнинг ҳолатини тиклашга қаратилган, - деди Ислом Тўхтахўжаев.

Фикрлар

Фикр қолдириш учун авторизациядан ўтинг!