Жамшид Искандеров ҳозирча Тошкентда...

Тошкентнинг «Локомотив» клуби БАА йиғинини якунлаб Тошкентга қайтган ҳолда 21 январь куни Осиё Чемпионлар лигаси плей-офф доирасида Тожикистоннинг «Истиқлол» жамоасига қарши бўладиган учрашув учун тайёргарлик кўрмоқда. Таркибда эса бир қатор ўзгаришлар юз берганидан хабардорсиз.

Шу кунларда жамоанинг плеймейкери Жамшид Искандеров борасида ҳам янгиликлар йўқ эмас. Ўтган мавсумда «Локо» таркибида 26 та ўйинда майдонга тушиб, 6 та гол урган ва 5 марта голли узатмани амалга оширган ярим ҳимоячининг кейинги фаолияти ҳақида эътиборга молик ўзгариш юз бериши кутилмоқда. Футболчи «Темирйўлчилар» билан БАА йиғинида иштирок этди. Маълум бўлишича, у «Локомотив»нинг ортга қайтишидан бир кун аввал жамоадагилар билан хайрлашиб кетган.

Олинган маълумотларга қараганда, Жамшидга Қатар, Жанубий Корея ва яна бошқа чемпионатлардан таклифлар мавжудлиги айтилмоқда. Шу боис ҳозирда унинг янги клубга қўшилгани тахмин қилинаётганди. Лекин воқеалар ривожи ҳали бу даражага етиб боргани йўқ. Боиси, Искандеров айни пайтда Тошкентда. Бу борада ўзи билан боғландик ва Жамшид яқин кунлар ичида барча масала ҳал бўлишини айтди. Аммо у айнан қайси клубга йўл олиши борасидаги хабарга аниқлик киритмади. Тез орада барчаси ойдинлашади.