Жавоҳир бугун дуранг ўйнаб, нафақат ўзи, балки Нодирбек учун ҳам ажойиб иш қилди

Нидерландиянинг Вей-анг-Зеб шаҳри мезбонлик қилаётган “Tata Steel Chess 2026” турнирининг 10-тур доирасидаги биз учун жуда муҳим бўлган учрашув ўз якунига етди. 

Мазкур баҳсда ҳамюртимиз Жавоҳир Синдаров нидерландиялик Жорден ван Форестга қарши оқ доналардан дуранг натижани қайд этди. 

Агар партия натижасини чуқурроқ таҳлил қиладиган бўлсак, Жавоҳир Синдаров бу ўйинда ўзига керакли бўлган натижани қайд этди. Ортиқча муаммоларсиз ва рискларсиз. 

Синдаров классик партияларда қора доналарда ўзини анча эркин ҳис қилади. Шу сабабли, шахматчимиз асосий персонал рақибига қарши баҳсда ғалаба учун ортиқча рискга бормади. Айтайлик ғалаба учун ҳужумкор ўйин таклиф этиб, якунда аксинча мағлубиятга учраганимизда – биринчидан асосий рақобатчимизни олдинга ўтказиб юборардик, иккинчидан эса нидерландиялик шахматчи очколари сонини 6.5 тага етказиб, лайф режимда Нодирбекдан ўтиб, биринчи ўринга кўтарилиб олиши хавфи мавжуд эди. 

Демак бу баҳсдаги дуранг нафақат Жавоҳирни пешқадамлар сафида сақлаб қолди, балки Нодирбек учун биринчи ўринда қолиш имкониятини осонлаштирди.

Маълумот ўрнида, Нодирбек Абдусатторов 11 турда Жорден ван Форестга қарши қора доналарда ҳаракат қилади. Шубҳасиз, баҳс анчагина мураккаб бўлади. Сабаби, ғолиб турнир жадвалида биринчи ўринга кўтарилиб олади.