Жеррард: “Локомотив”га қарши ўйинни интиқлик билан кутяпмиз

“Рейнжерс” расмий сайти 11 январь куни Тошкентнинг “Локомотив”ига қарши синов-назорат ўйини ўтказилишини маълум қилди.

Ушбу ўйин Дубайдаги “Севенс” стадионида бўлиб ўтади.

“Рейнжерс” бош мураббийи Стивен Жеррард: “Локомотив”га қарши ўйинни интиқлик билан кутяпмиз. Дубайдаги илиқ ҳавода ўйин юқори сифатда ўтиши шубҳасиз.

Биз мавсумнинг иккинчи даврасига тайёргарлик яхши бўлишини истаймиз ва бўлажак ўртоқлик ўйинлари биз учун муҳим аҳамият касб этишини айтиб ўтаман.”

“Локомотив” бош мураббийи Андрей Фёдоров ҳам ўз фикрларини билдирди: “Рейнжерс” каби буюк тарих ва катта шон-шуҳратга эга бўлган жамоага қарши ўйнаш биз ва ўзбек футболи аҳли учун ҳам анчагина ҳаяжонли.

Дубайдаги мавсумолди йиғинлар якунланганидан кейин асосий таркиб учун кураш кучаяди. Шу боисдан, жамоа “Рейнжерс”га қарши баҳсда бор кучини бериб ўйнашга ҳаракат қилади.”

“Севенс” стадиони футболнинг айни дамдаги барча талабларига жавоб берадиган шароитларга эга, ўз бағрига 50 мингдан зиёд мухлисларни сиғдира олади. Бунга қадар ушбу стадионда “Реал” ҳамда “Милан” жамоалари ўзаро ўртоқлик ўйини ўтказишган, шунингдек, Жастин Бибер ҳам концерт берган.

“Рейнжерс” жамоаси эса Дубайда 6-12 январь кунлари ўз йиғинини ўтказиб қайтади.

Манба: "Локомотив" расмий сайти