Кариус Чемпионлар лигаси финалига боришни истамаяпти

Мавсумни "Бешиктош" сафида ижара асосида ўтказган "Ливерпуль" дарвозабони Лорис Кариус “Тоттенхэм”га қарши бўлиб ўтадиган Чемпионлар лигаси финалига бориш таклифини рад этди. Бу ҳақда Daily Mail нашри хабар тарқатмоқда.

Берилган маълумотларга қараганада мерсисайдликлар ижарада тўп сураётган футболчисини ҳам ўзлари билан бирга Мадридга олиб кетишни таклиф қилишган. Бироқ, германиялик посбон бу ўйинга боришни рад этмоқда. Унинг фикрича агар у финалга борса, бутун дунё ишқибозлари диққати майдонга эмас, унга қаратилиши мумкин.

Эслатиб ўтамиз, Кариус роппа-роса бир йил муқаддам “Реал” Мадридга (3:1) қарши бўлиб ўтган ЕЧЛ финалида иккита жуда қўпол хатога йўл қўйган ва натижада унинг жамоаси мағлуб бўлган эди.

Маълумот учун, “Тоттенхэм” ва “Ливерпуль” жамоалари ўртасидаги финал учрашуви 1 июнь куни Мадриддаги “Ванда Метрополитано” стадионида бўлиб ўтади.