Килиан Мбаппе ҳакамни ҳақорат қилгани айтилмоқда

"Реал Мадрид" ҳужумчиси Килиан Мбаппе Ла Лига 13-турида "Эльче"га қарши ўйин (2:2) якунлангач ҳакамни ҳақорат қилган бўлиши мумкин.

"DAZN" камералари якуний ҳуштакдан сўнг француз футболчисининг бош ҳакам Франсиско Эрнандес Маэсо билан тортишганини қайд этди. Шу баҳс учун Мбаппега сариқ карточка кўрсатилди. Шундан кейин у орқага бурилиб, француз тилида икки маротаба баланд овозда "пасткаш" деган ҳақоратни айтди.

Мбаппе кийиниш хонасига қайтаётганда "Эльче" футболчиларидан бири унга мурожаат қилди, аммо Килиан унга қўли билан ишора қилиб "тўхта" деди ва орқасидан яна: "пасткаш, кет!" дея бақирди.

"DAZN" хабарига кўра, Мбаппе ҳакамнинг 8 дақиқа қўшимча вақт тугаган заҳоти ўйинни якунлаганидан норози бўлган. Чунки "Эльче" дарвозабони Иньяки Пенья "Реал"нинг иккинчи голидан сўнг узоқ вақт тиббий ёрдам олган. Бир пайтда Мбаппе ҳакам Маэсога шундай деди: "Етар, у жуда кўп ётиб қолди. Агар давом эттира олмаса, майдонни тарк этсин". 

Маълумотларга кўра, футболчи мазкур ҳаракатлари учун 4 ўйиндан 12 ўйингача дисквалификация қилиниши мумкин.