Ламин Ямал бир зарба билан рекорд ўрнатиб қўйди

“Барселона” юлдузи Ламин Ямал УЕФА Миллатлар лигасида Испания терма жамоаси сафида халқаро майдонда навбатдаги прекордини ўрнатди.

Нуфузли мусобақанинг чорак финал жавоб учрашувида испанлар ўз майдонида Нидерландия терма жамоаси билан куч синашди. Беллашувнинг асосий ва қўшимча вақти 3:3 ҳисобида дуранг билан якунланди.

Ғолиб пенальтилар сериясидан аниқланди ва унда мезбонларнинг қўли баланди келди – 5:4.

Ушбу тўқнашувнинг қўшимча вақтида Ламин Ямал нидерландияликлар дарвозасини ишғол қилганди. Бу гол уни УЕФА Миллатлар лигаси тарихига олиб кирди.

Ламин ушбу мусобақа тарихида тўп киритган энг ёш футболчи бўлди. Ўйин пайтида у 17 ёшу 258 кунлик эди.

Аввалги рекордни унинг клубдоши ва ҳамюрти Гави ўрнатганди. Бу футболчи Миллатлар лигасида илк голини 17 ёшу 304 кунлигида урган.

Таъкидлаш жоиз, ярим финалга йўлланма олган Испания терма жамоаси Миллатлар лигасининг амалдаги ғолиби ҳисобланади ва бу гал ҳам бош совринга асосий даъвогарлардан бўлиб турибди.