Легионеримиз чемпионликни қўлга киритганидан сўнг: "Бизнинг жамоа чемпионатда рекорд қўйди"

Четда тўп сураётган легионерларимиз орасида Бангладеш чемпионатида фаолият олиб бораётган Асрор Ғофуров ҳам борлигини унутмагандирсиз.

Маҳаллий “Башухандра Кингз” клуби шарафини ҳимоя қилаётган легионеримиз мамлакат чемпионлигини қўлга киритди. Мазкур муваффақиятли натижадан кейин футболчимиз ўз муносабатини билдирди.

“Бу жуда ёқимли”

- Ўтган йили “Саиф Спортинг” жамоасида эдим. Ўшанда биз чемпионатда 3-ўринни олгандик. Бу йил эса бошқа клубга ўтдим ва чемпионликни қўлга киритдик. Тўғриси, бу биринчи чемпионлигим эмас. Олдин Туркия 4-дивизионида ўйнаб чемпион бўлганмиз. Рости, бу жуда ҳам ёқимли. Қаерда бўлсак ҳам чемпионлик қўлга киритилгач, Ўзбекистон байроғини баланд кўтарамиз. Бундан хурсандман.

“75 йил ичида кетма-кет 4 марта чемпион бўлган илк жамоага айландик”

- Энг катта зўр хис-туйғуни бағишлагани шундаки, Бангладеш чемпионати 75 йилдан бери ўтказиб келинар экан. Бизнинг клуб эса чемпионатда рекорд қўйди. Чунки ҳали тарихда ҳеч бир жамоа кетма-кет 4 марта чемпионликни қўлга киритмаган. Шунинг учун жамоамиз билан шунга эришиш учун роса ҳаракат қилдик. 75 йил ичида кетма-кет 4 марта чемпион бўлган илк жамоага айландик.

“ОЧЛ плей-офф босқичида ўйнаймиз”

- Осиё Чемпионлар лигаси плей-офф босқичида ўйнаймиз. Рақибимиз – “Шаржа” кучли жамоа. Бангладеш чемпионатидан кучлироқ, уларнинг чемпионати. Ҳеч ким ютқазиш учун чиқмайди. Ҳамма ғалаба учун курашади. Биз ҳам майдонга фақат ғалаба учун ҳаракат қиламиз. Аслида ОКМК билан ўйнашимиз кутилаётганди. Аммо бундай ўзгаришни ҳеч ким ўйламаганди. Ўзим ҳам рақиб ўзгарганига ҳайрон қолдим. Бу – футбол ва унда ҳамма нарса бўлиши мумкин. Ўйлайманки, биз ҳам қўлимиздан келганича ҳаракат қиламиз.

“Бангладешликлар мени биринчи чемпион бўлган ўзбекистонлик дея табриклашди”

- Уларнинг муносабатлари яхши. Чемпионликни қўлга киритганимиздан кейин ўйин тугаши билан Бангладешда ўйнаётган ўзбекистонлик футболчилар орасида биринчи чемпионликни ютган футболчига айланганим ҳақида айтишди. Бу ерга шунча ўзбекистонлик ўйинчилар келгану, аммо ҳеч бири чемпион бўлишмаганди, сиз биринчиси бўлдингиз, хурсанд бўлинг, биз ҳам хурсандмиз, деб ўз фикрларини айтишди ва қўллаб-қувватлашди.

“Ўзбекистондан таклифлар бўлгани йўқ”

- Ҳозирча ўз жамоам билан биргаман. Шартномам шу йилнинг ноябрь ойида тугайди. Олдимизда ОЧЛ плей-офф ва ОФК Кубоги ўйинлари бор. Яна чемпионатнинг иккита ўйини ҳам қолган. Шуларни якунлаганимиздан кейин олдимизга яна мақсад қўямиз. Тўғри, ҳозирда қизиқишлар бўляпти. Малайзиянинг иккита жамоасидан таклиф тушди. Рад жавобини беришга мажбур бўлдим, чунки шартномам бор. Ҳозирги ўйнаётган жамоам ҳам шартномани узайтириш бўйича таклиф билдиряпти. Бангладешни яна бошқа клубларидан ҳам қизиқишлар бор. Ўзбекистон клубларидан ҳеч қанақа таклифлар йўқ. Ўйинингизни қаерда кузатишса, албатта қизиқишлар бўлади.

Шуҳратбек Жўраев.