Легионеримиз тезроқ Премьер-лигага қайтмоқчи

Ўзбекистон футбол ишқибозлари Россия чемпионатини мунтазам кузатиб боради. Бу мамлакат Премьер-лигаси ва биринчи лигасида доимо ўзбекистонлик футболчилар тўп тепиб келиши анъанага айланган.

Бу мавсум юқори дивизионда икки футболчимиз ўйнади. Иброҳимхалил Йўлдошев “Нижний Новгород” жамоасининг Премьер-лигадаги жойини сақлаб қолишига ҳисса қўшди. Жамоа чемпионатни 30 очко билан 13-ўринда якунлади.

Истеъдодли ҳимоячимиз чемпионат доирасида 28 та учрашувда майдонга тушиб,  “Сочи” ва “Урал” дарвозаларига биттадан тўп киритди ва жамоадошларига битта голли пас узатди. Бундан ташқари, 22 ёшли ўйинчимиз Россия кубогида олтита баҳсда қатнашиб, битта ассист қайд этди.

Ҳужумкор футболчимиз Ҳожимат Эркиновнинг омади чопмади. Москванинг “Торпедо” жамоаси дебют мавсумида юқори дивизион учун кучсизлик қилди. Пойтахтликлар атиги 13 очко билан сўнгги поғонада қолиб кетди ва келаси йили биринчи лигада ўйнайдиган бўлди.

“Пахтакор” тарбияланувчиси бўлган Ҳожимат легионер сифатидаги биринчи мавсумида чемпионатда 20 марта майдонга тушди ва ўз ҳисобига битта голли пас ёздириб қўйди. Шунингдек, кубок учрашувида тўрт маротаба ўйнади.

Эркинов “РБ Спорт” нашрига берган интервьюсида жамоасининг келаси мавсумдаги режалари билан ўртоқлашди.

- “Торпедо” келаси мавсум Россия Премьер-лигасига қайтишга қодир. Бу иш қўлимиздан келади, деб ўйлайман.

Мен биринчи лиганинг даражасини билмайман. Чунки ҳеч қачон у лигада ўйнамаганман. Лекин Премьер-лигадан нимаси биландир фарқ қилса керак, деган фикрим бор.

Бир мавсумда яна Премьер-лигага қайтиш учун қўлимиздан келганини қилишга уриниб кўрамиз. Бу ҳам биз учун қизиқ чорлов бўлади, - деди Ҳожимат Эркинов.

Таъкидлаш жоизки, келаси мавсум Россия Премьер-лигасида ўйнайдиган футболчиларимиз сони ошиши кутилмоқда. “Нижний Новгород”даги Иброҳимхалил Йўлдошев сафига Рустам Ашурматов ва Умарали Раҳмоналиев қўшилади.

Бу футболчилар ўйнаётган “Рубин” жамоаси биринчи лига беллашувларида ғолиб чиқиб, тўғридан тўғри юқори дивизионга йўлланма олди.

Марказий ярим ҳимоячи ҳисобланган 19 ёшли Умарали Раҳмоналиев январь ойида “Бунёдкор”дан “Рубин”га ўтди. У қозонликлар билан шартнома имзолаганидан кейин тўрт маротаба майдонга тушди.

Тажрибали ҳимоячи Рустам Ашурматов “Навбаҳор”ни эркин агент сифатида тарк этиб, “Рубин” сафига қўшилди. Россиядаги дебют мавсумида 26 ёшли футболчимиз бешта баҳсда қатнашиб, битта гол уришга ҳам эришди.

Ҳар икки футболчимизнинг қозонликлар билан шартномаси 2026 йилнинг 30 июнигача тузилган.

Шомуродов кейинги мавсумни қаерда бошлайди?

Роналду Машариповга нималарни ўргатди?

Бу терма жамоада Шомуродов йўқ!

Баҳайбат футболчи тезликда Шомуродовга етиб олди

Шомуродов ва Нзола "Милан"га қарши жасорат кўрсатиши керак!