Легионерларимиз премьер-лига сари юришни бошлайди!

Бугун Россия Миллий футбол лигасининг янги мавсуми старт олмоқда. Унда кучли жамоалар келаси йили премьер-лигада иштирок этиш ҳуқуқи учун курашади.

Янги мавсумда ушбу мусобақада жами 20 та жамоа ўзаро рақобатлашади.

Ўзбекистонлик футбол ишқибозлари “Балтика” ва “ Нефтехимик” жамоалари ўйинини алоҳида эътибор билан кузатиши шубҳасиз. Чунки, Виталий Денисов калининградликлар шарафини ҳимоя қилса, Вагиз Галиулин нижнекамскликлар сардори ҳисобланади.

Ўзбекистонлик легионерлар ўйнайдиган ҳар икки клуб олдига премьер-лига йўлланмасини қўлга киритиш вазифаси юкланган.

Бундан ташқари, ҳамюртларимиз “Спартак-2” жамоаси ўйинларини ҳам кузатиб боришига тўғри келади. Асосий жамоага киритилмаган Остон Ўрунов мавсумни катта эҳтимол билан москваликларнинг иккинчиси жамоаси таркибида бошлайди.

Асли “Спартак” раҳбарияти яхшигина маош оладиган ўзбек футболчисини сотиб юбориш ёки ижарага беришни режалаштирмоқда. Бироқ, клуб охирги ярим йил ичида футболчимизни тўлиқ трансфер қилишни истаган “Рубин” ва “Уфа” жамоалари билан трансфер суммаси ва тўлов  муддати бўйича келиша олмади.

Охирги маълумотларга қараганда, ҳозир Остон Ўрунов хизматларига қизиқаётган бирорта жамоа қолмади. Аввалроқ, Венгриянинг машҳур клуби “Ференцварош” ўзбек ярим ҳимоячисига таклиф билан чиққан эди, бироқ Ўруновга улар ваъда қилган маош тўғри келмагани ортидан футболчи рад жавобини бергани ҳақида хабарлар тарқалди. Хуллас, вазият ўзгармаса. Остон Ўрунов ҳам Миллий футбол лигасида жавлон уради. Лекин унинг клуби премьер-лига учун курашмайди. Жамоанинг асосий мақсади биринчи жамоага сифатли футболчиларни тайёрлаб бериш холос.

Энди Галиулин ва Денисов ҳақида.

Галиулин ўтган мавсумда “Нефтехимик”нинг ҳақиқий етакчиси эканини кўрсата олди. Тажрибали ярим ҳимоячимиз жами 31 та учрашувда майдонга тушиб, рақиблар дарвозасини тўрт марта ишғол қилди. У гол урган учрашувларда жамоаси очко йўқотгани йўқ.  Унинг аниқ зарбалари эвазига “Нефтехимик” футболчилари “Енисей”ни 2:0, “Краснодар-2”ни 5:0, “Динамо-Брянск”ни 5:1 ҳисобида мағлубиятга учратди.

Жамоа таркибидаги  яна бир футболчимиз Бобур Давлатов 15 та учрашувда қатнашиб, битта голли пас муаллифи бўлди. Лекин мавсум якунлангач, бу ярим ҳимоячи юртимизга қайтиб келди.

Виталий Денисов ўтган йили “Томь” шарафини ҳимоя қилди. Аниқроғи, омадсиз стартдан сўнг, томскликлар эркин агент сифатида ишсиз юрган тажрибали ҳимоячини ёрдамга чақирди. Ўзбекистонлик легионер жамоа ҳимоясини сезиларли даражада кучайтирганига қарамай, “Томь” хавфли ҳудудда қолиб кетди. Денисов якунланган мавсумда 23та учрашув ўтказди. Яна эркин агентга айланган футболчимизни “Балтика” ўз таркибига қўшиб олди ва 1+1 тизимида шартнома имзолади.

Хуллас, бугун бошланаган янги мавсумда “Балтика” илк учрашувини сафарда “Факел” футболчиларига қарши ўтказади.

“Нефтехимик” эса ўз майдонида қуйи лигадан чиққан “Олимп-Долгопрудний” жамоасини қабул қилади.

“Спартак-2” футболчилари “Краснодар-2” билан куч синашади. Мухлисларимиз эътиборидаги бу уч учрашув Тошкент вақти билан 20:00да бошланади.

Қолган учрашувларда қуйидаги жамоалар ўзаро рақобатлашади:

“Акрон” – “СКА-Хабаровск”

“Оренбург” – “Волгарь”

“КАМАЗ” – “Алания”

“Кубань” – “Торпедо”

“Велес” – “Енисей”

“Ротор” – №Текстильшик”

“Металлург” – “Томь” .

Натижаларни sports.uz сайти орқали кузатиб боринг.   

 Легионеримиз: Бу зўр жамоа экан!

 Абрамов ишонч билдирмаган тўпурар легионеримизни Европага сотишмоқчи!

Шомуродов мутахассислар фикрини ўзгартирди!