"Ливерпуль" Слотнинг ўрнига янги мураббий топди

Лондоннинг "Тоттенхэм" клуби собиқ бош мураббийи Анже Постекоглу Англиянинг яна бир гранд жамоасига бош мураббий бўлиб келиши мумкин. Teamtalk нашри хабар беришича, унинг номзоди "Ливерпуль" раҳбарияти томонидан кўриб чиқилмоқда.

Манбага кўра, "қизиллар"нинг амалдаги мураббийи Арне Слот сўнгги омадсиз натижаларга қарамай, клуб раҳбарияти ишончини ҳозирча сақлаб турибди. Аммо жамоа ҳолати яхшиланмаса, нидерландиялик мутахассис истеъфога чиқарилиши мумкин.

Слот ўтган йилнинг ёзида мерсисайдликлар бош мураббийи лавозимига тайинланган эди. Унинг қўл остида клуб ўтган мавсум АПЛ чемпиони бўлган.

Маълумот учун,"Ливерпуль" ўзининг сўнгги ўйинида Чемпионлар лигасида ПСВга йирик 4:1 ҳисобида мағлуб бўлди.