"Манчестер Сити" - ПСЖ: Махрез дублни расмийлаштирди! (матнли трансляция)

Ассалому алайкум, мухтарам футбол ихлосмандлари! Европа Чемпионлар Лигаси ярим финалидан ўрин олган "Манчестер Сити" - ПСЖ жамоалари ўртасидаги жавоб учрашуви матнли трансляция кўринишида эътиборингизга ҳавола этилади.

• 90+2'
  

  Учрашув якунланди. "Манчестер Сити" ўз тарихида илк бор ЕЧЛ финалига чиқди!

• 90+1'

  Неймарнинг стандартдан йўллаган зарбасига аниқлик етишмади.

• 90'
  

  Ўйиннинг асосий вақтига 2 дақиқа қўшилди.

• 89'
  

  Данилуга сариқ карточка кўрсатилди.

• 89'

  Неймар жарима майдони ичида бироз вақтни чўзиб юборди. Ҳимоячилар уни тўхтатди.

• 87'
  

  Габриэль Жезусга нисбатан жиддий қўполлик ишлатган Кимпембе огоҳлантирилди.

• 85'
  

  Фил Фоден ўз ўрнини Серхио Агуэрога бўшатиб берди.

• 84'

  Стерлинг жарима майдони ичида шериги узатган тўпга ета олмади.

• 82'
  

  Жезус ва Стерлинг захирадан ўйинга қўшилди. Улар ўрнига Де Брюйне ҳамда Бернарду Сильва майдонни тарк этди.

• 80'
  

  Фоденнинг зарбасини Навас эгаллаб олди. ПСЖ футболчилари уйғониши лозим.

• 78'

  Де Брюйне ҳам жарима майдони ташқарисидан ўз омадини синаб кўрди. Тўп мўлжалга аниқ бормади.

• 77'

  Фил Фоденнинг зарбасидан кейин тўп устунга тегди.

• 77'

  Гвардиола армияси тўпни ушлаб туриш бўйича рақибга мастер-класс кўрсатяпти.

• 75'
  

  Паредес ва Флоренци ўрнига Данилу ҳамда Дагба ўйинга қўшилди.

• 74'
  

  Бу сафар Кевин Де Брюйне огоҳлантирилди.

• 73'

  Ишончли ҳисобда олдинга ўтиб олган манчестерликлар ҳамон прессинг уюштирмоқда. Мана бу ҳақиқий футбол!

• 71'
  

  Фоденга нисбатан қоида бузган Вераттига сариқ карточка кўрсатилди.

• 71'
  

  Зинченко ҳам бироз асабийлашиб кетди ва ҳакамга эътироз билдирди. Кюйперс уни огоҳлантирди.

• 70'

  Парижликлар кўзидаги олов ўчиб қолди. Футболчилар энди бир-бирини синдириш учун ўйнамоқда.

• 69'
  

  Ди Мария асабларини жиловлай олмади. Фернандиньога очиқчасига зарба берган Анхель майдондан четлатилди.

• 67'

  Дракслернинг уринишидан кейин Стоунс тўп йўлига блок қўйишга эришди.

• 66'

  Паредес кераксиз вазиятда ноаниқ зарба йўллаб, жамоасига панд бериб қўйди.

• 65'

  Парижликлар асабийлаша бошлади. Бу муаммоларни кўпайтирмоқда.

• 63'
  

  ГОООООООООООЛ! Махрез ўйин тақдирини деярли ҳал этди!

  Қанотдан етказиб берилган тўпни Рияд бўш қолган дарвозага киритди.

• 62'
  

  Почеттинодан юриш: Икарди ва Эррера ўрнига Кин ҳамда Дракслер ўйинга қўшилди.

• 61'

  "Сити" ҳимоячилари мудофаада ҳақиқий қўрғон барпо этди. Рақибнинг уринишлари бартараф этилмоқда.

• 60'

  Тўп ҳамон Гвардиола шогирдларида. ПСЖ қийин аҳволда қолмоқда.

• 58'

  "Сити"нинг тики-такаси рақибнинг бошини айлантириб ташламоқда.

• 56'

  Де Брюйне Маркиньосни алдаб ўта олмади.

• 55'

  Рақиб жарима майдонига ёриб кирган Неймарнинг зарбасини Зинченко қайтариб қолди. Бугун Олександр жамоасига катта наф келтирмоқда.

• 54'
  

  Фоденнинг бу сафарги уринишини яна Навас қайтарди. Бу сафар ўйинни давом эттириш мумкин.

• 54'
  

  Фоден бирга-бир вазиятга чиқиб борди ва зарба берди. Навас ўз ўрнида. Камига, ён ҳакам байроқчасини кўтарди.

• 53'

  Паредес рақиб жарима майдони ичида қоида бузди. Ҳакам ўйинни тўхтатди.

• 51'

  Парижликлар ташаббусни қўлга олишга уринмоқда. "Сити" бўш келмоқчи эмас.

• 49'

  Ди Мария пас бериш мумкин бўлган позициядан зарба йўллади. Тўп ҳимоячидан қайтди.

• 48'

  "Шаҳарликлар" иккинчи таймда ҳам тўп назоратини қўлга олишга уринмоқда.

• 46'
  

  Иккинчи тайм бошланди. ПСЖ учун сўнгги имконият!

• 46'

  Футболчилар майдонга қайтди. Биз ҳам қайтамиз!

• 45+3'
  

  Танаффус!

• 45+3'
  

  Де Брюйне бурчакдан тўпни тўғридан-тўғри дарвозага йўллади. Навас яна яхши ҳаракат қилди.

• 45+2'
  

  Рияд Махрезнинг ўткир бурчакдан берган зарбасини Навас қайтариб юборди.

• 45+1'

  Ди Мария қанотда Зинченкони алдаб ўта олмади. Тўп йўқотилди.

• 45'
  

  Биринчи таймга 3 дақиқа қўшиб берилди.

• 44'

  Махрезнинг ноаниқ узатмаси жамоаси қарши ҳужуми барбод бўлишига сабаб бўлди.

• 42'

  Тўп назорати тезлик билан алмашмоқда. Сўнгги дақиқаларда темп юқори.

• 40'

  Майдоннинг сифати айниқса Ди Мариянинг ҳозирги узатмасида яққол сезилди. Меҳмонларнинг навбатдаги ҳужуми эрта якун топди.

• 39'

  Диаллонинг қаноти бугун фаолроқ. ПСЖнинг ўнг қаноти деярли ишламаяпти.

• 37'

  Де Брюйне стандартдан тўпни жарима майдони ичига оширди. Ҳимоячилар илдамроқ чиқди.

• 36'

  Андер Эррера ноқулай позициядан зарба берди. Кутилганидек, уриниш омадсиз чиқди.

• 34'

  Почеттино шогирдлари позицион ҳужумлар билан олдинга ўтмоқда.

• 33'

  Гвардиола шогирдлари зич ва тартибли ҳимояланмоқда. Парижликлар ҳужумда катта қийинчиликка дуч келяпти.

• 31'

  Флоренцининг узатмасидан кейин Ди Мария тўпни шеригига қолдирди. Аммо тўпга рақиб футболчиси аввалроқ етиб келди.

• 30'

  Де Брюйненинг жарима майдони ташқарисидан йўллаган зарбаси ноаниқ кетди.

• 28'

  Фернандиньо ҳужумда тактик фол ишлатди. Бу билан у рақибнинг эҳтимолий қарши ҳужумини тўхтатди.

• 27'

  Ди Мария ноаниқ узатмаси билан жамоасининг камсонли ҳужумларидан навбатдагисини барбод қилди.

• 26'

  Бир неча дақиқадан бери тўп "Сити" футболчилари назорати остида бўлиб турибди. 

• 24'

  Мезбонлар қанотлар бўйлаб кроослар амалга ошириб ҳужум ташкил этмоқда.

• 22'
  

  Гюндоган билан тортишиб, ҳакамга ҳам эътироз билдирган Андер Эррерага сариқ карточка кўрсатилди.

• 21'

  Гвардиола шогирдлари тўпни ўзларида ушлаб туриш орқали рақибнинг шаштини пасайтиришга ҳаракат қиляпти.

• 19'

  Рақибдан тўпни олиб қўйган Ди Мария узоқ масофадан бўш қолган дарвозани нишонга олди. Унинг зарбасидан кейин тўп устун ёнгинасидан ўтиб кетди.

• 19'

  Стандартдан жарима майдонига оширилган тўпга Кимпембе кўнгилдагидек зарба бера олмади.

• 17'

  Ди Мариянинг узатмасидан кейин баланд сакраган Маркиньоснинг зарбаси тўсинга тегди. Бразилиялик футболчига бироз омад етишмади.

• 16'

  Неймарнинг уринишидан кейин тўп жонли девордаги Фернандиньога тегди. Меҳмонлар тўпни бурчакдан ўйинга киритиб беради.

• 15'

  Жарима майдонига яқин ҳудудда Гюндоган Неймарни йиқитди. ПСЖда қулай имконият юзага келди.

• 14'

  Диалло қанотдан тўпни жарима майдонига узатди. Эдерсон тўпни ушлаб олди.

• 12'

  Гол уриб олган "шаҳарликлар" тўп назоратини қўлга олишга ҳаракат қилмоқда.

• 11'
  

  ГООООООООООООЛ! Учрашувда ҳисоб очилди!

  Рияд Махрезнинг ўткир бурчакдан йўллаган зарбаси Наваснинг оёқлари орасидан ўтиб, дарвоза тўридан жой олди.

• 9'

  Ҳозирча, майдон эгалари рақибнинг фаол стартига жавоб бера олганича йўқ.

• 8'
  

  Видеотакрорларни ўз кўзи билан кўрган ҳакам пенальтини бекор қилди. Ҳақиқат қарор топди.

• 7'
  

  Жарима майдони ичида тўп Зинченконинг елкасига тегди. Ҳакам нуқтага ишора этди.

• 5'

  Илк зарба меҳмонларда. Неймарнинг уринишини ҳимоячилар бартараф этди.

• 4'

  "Сити" эрта прессинг уюштирмоқда. ПСЖ қисқа паслар билан рақибдан ўтишга уриняпти.

• 2'

  Майдон қор билан қопланган. Бу футболчиларга анчагина муаммолар туғдирмоқда.

• 1'
  

  Ўйин бошланди!

• 0'

  Сардорлар иштирокидаги расмий жараёнлар ортда қолди. Старт учун барчаси тайёр!

• 0'

  Футболчилар майдонга тушиб келди. Чемпионлар лигасининг мафтункор мадҳияси янгради.