“Манчестер Сити” Ҳусанов орқали янги бизнесни йўлга қўйди!

“Манчестер Сити” жорий йилнинг 20 январь куни Франциянинг “Ланс” клубидан Абдуқодир Ҳусановни ўз таркибига қўшиб олгани, “шаҳарликлар”га футболдан ташқари соҳаларда ҳам фойда келтира бошлади.

Аввалроқ, Англия футболи таҳлилчилари 21 ёшли ўзбек ҳимоячисининг трансферидан кейин чипталар савдоси жадаллашгани ва “Этихад” аренага Ўзбекистондан ташриф буюраётган мухлислар оқими сезиларли даражада ошгани ҳақида маълумотлар тарқатилган эди.

Нуфузли манбалардан бири – cityxtra.co.uk портали “Манчестер Сити” Абдуқодир Ҳусанов трансферидан кейин Осиё қитъасида бизнес ҳамкорлиги ривожлана бошлангани ҳақида мақола чоп этди.

Sports.uz  портали ушбу мақолани ўзбекистонлик футбол ишқибозлари эътиборига ҳавола этишни маъқул топди.

- “Манчестер Сити” Абдуқодир Ҳусанов трансфери Осиё қитъасида минтақавий  ҳамкорлик тараққиётини янги босқичга кўтарганини маълум қилди.

“Шаҳарликлар” Осиёдаги мавқеини мустаҳкамлаб олиш мақсадида Вьетнамда ишлаб чиқариладиган Wake-Up 247 энергетик ичимлик брендини шзининг расмий ҳамкори, деб эълон қилди.

Премьер-лиганинг амалдаги чемпионлари дунёнинг йирик қитъасида сенсацион даражада аудитория тўплагани билан мақтана олади. Айниқса, ҳимоячи Абдуқодир Ҳусанов билан январда тузилган шартномадан кейин бу клубнинг Ўзбекистонда машҳурлиги жадал ўсиб бормоқда.

Маълум қилинганидек, Ҳусанов “Ланс”дан 33 миллион фунт стерлингдан кўпроқ маблағ эвазига олиб келинди. Премьер-лиганинг кетма-кет тўрт учрашувида 21 ёшли футболчининг ўйинларини бевосита стадиондан кузатиш учун чипата олиб, Ўзбекистондан келган ишқибозлар сони кескин ошгани кузатилди.

Ўзбекистоннинг Англия юқори дивизионида ўйнаган биринчи футболчиси сифатида ўзини кўрсатган Абдуқодир Ҳусанов  “Манчестер Сити”га келиши билан Осиё футболига жуда катта таъсир ўтказди.

Бунда ўзбек ҳимоячиси қисқа фурсатда Хосеп Гвардиола жамоасининг асосий фигураларидан бирига айлангани муҳим омил бўлиб хизмат қилди.

Энди “Сити” Wake-Up 247 бренди билан ҳамкорликни йўлга қўйиб, шимоли-шарқий Осиёдаги позициясини мустаҳкамлади. Бу бренд маҳсулотларига “Манчестер Сити” клуби белгиси ва Эрлинг Холанд, Фил Фоден ва Кевин де Брюйне каби юлдузлар сурати туширилган ҳолда ишлаб чиқарилади.

“Манчестер Сити” Вьетнам компаниясига ўз ичимликларини мамлакат ташқарисида ҳам танитиш учун “Этиҳад” аренасига ўрнатилган реклама лавҳларидан жой ажратадиган бўлди.

- Биз “Манчестер Сити” билан ҳамкорлик қилишдан беҳад мамнунмиз. Бу биз доимий равишда ривожланиш учун ҳар бир имкониятдан фойдаланиш йўлидаги интилишларимизни қўллаб-қувватлаётган ташкилотдир.

Wake-Up 247 бренли орқали биз истеъмолчиларни ўз муаммоларини ҳал қилиш йўлида қатъият билан олдинга қадам ташлашга ундаймиз. Бу ҳамкорлик ҳар икки ташкилот учун идеал даражада бир бирига мос келади, чунки  Wake-Up 247 ҳам, “Манчестер Сити” ҳам ҳар кимни юксак мақсадларга эришишга илҳомлантиради, - деди Wake-Up 247 брендига эгалик қилувчи Masan Consumer Holdings компанияси бош директори Тханг Чионг Конг.

- Wake-Up 247 билан ҳамкорлик ўрнатилганини эълон қилишдан хурсандмиз. Биз бу брендни қўллаб-қувватлаймиз. Клубимизнинг бутун Осиё қитъасида, хусусан Вьетнамда ҳам садоқатли ишқибозлари бор.

Wake-Up 247  брендининг янги қизиқарли ғоялар орқали бизнинг ушбу минтақадаги мухлисларимиз кўнглини олиш бўйича ишлаш имконияти ошишини кутиб қоламиз, - деди “Манчестер Сити”га эгалик қилувчи City Football Group холдингининг глобал ҳамкорлик савдолари бўйича вице-президенти Кейтлин Бил хоним, - деб ёзмоқда cityxtra.co.uk портали эксперти Ваям Лахоти.

Эслатиб ўтамиз, “Манчестер Сити” Ўзбекистон миллий терма жамоаси ҳимоячиси Абдуқодир Ҳусановни ўз сафига қўшиб олиш учун бонуслар билан қўшиб ҳисоблаганда 50 миллион евро миқдорида харажат қилишига тўғри келди.

“Шаҳарликлар” таркибида Англия Премьер-лигаси, мамлакат кубоги ва Европа Чемпионлар лигасида дебютини ўтказиб бўлган ўзбек легионери манчестерликлар билан 2029 йилнинг ярмигача давом этадиган шартномага имзо чеккан.

“Зидан финти”ни қўллаган Шомуродовнинг ўйини қандай баҳолади?

Ҳусановнинг дўстини маҳалладан кўчириб юборишди

Бугун ўйин: Гвардиола Ҳусановни майдонга туширадими?

Шомуродов худбин эмас! Раньери Элдор ҳақида яна қандай фикр билдирди?

Шомуродов мухлисларга мурожаат йўллади!