“Манчестер Юнайтед” Роналдуни катта пулга “сотиб олмоқчи”

“Манчестер Юнайтед” ва Португалия терма жамоаси форварди Криштиану Роналду “қизил иблислар” раҳбариятидан катта миқдорда бонус олди. Британия ОАВ хабарига кўра, ҳужумчи ёзда клубни тарк этиш истагини билдирганидан сўнг, манкунианликлар ўз футболчисининг фикрини ўзгартириш учун шундай йўл тутган.

Олдинроқ португалиялик Бундеслига ёки А серия клубларидан бирига ўтиши мумкинлиги ҳақида хабарлар тарқалганди. Ижтимоий тармоқларда КриРонинг агенти "Барселона" президенти Жоан Лапорта билан учрашгани ҳақида ҳам маълумотлар пайдо бўлди. Кеча эса футболчининг агенти Криштианунинг хизматларини ПСЖга таклиф қилгани ҳақида миш-мишлар пайдо бўлди.

Роналдунинг кетишдаги асосий сабабларидан бири — катта совринларга даъвогар клубга ўтиш истаги. Қолаверса, португалиялик "қизил иблислар"нинг ёзги трансфер ойнаси пайтидаги суст ҳаракатларидан ҳам норози бўлгани ҳам айтилган.

Маълумот ўрнида, ҳужумчининг инглиз клуби билан шартномаси 2023 йилнинг ёзида якунига етади.