Мен ҳеч қачон АҚШ терма жамоасини бошқармайман!

Канада терма жамоаси бош мураббийи Жесси Марш ўз шогирдарини жаҳон чемпионатида 1/8 финалга олиб чиққанидан сўнг, АҚШ терма жамоасини бошқариш эҳтимоли ҳақидаги саволларга аниқ жавоб беришига  тўғри келди. 

Ҳозирча АҚШ терма жамоасига Маурисио Почеттино бошчилик қилмоқда. Аргентиналик мутахассис мундиалдан кейин Европага қайтиб, гранд клублардан ишлашни режа қиляпти. 

- Кўпчилик: "Ҳа, у АҚШ терма жамоасини бошқаришни истайди”, деб гапиради. Келинглар, бу масалани бир умрга ёпиб қўямиз: мен ҳеч қачон АҚШ терма жамоасини бошқармайман. Ҳеч қачон. Ва бу ерда ҳеч қандай муаммо йўқ. 

Бир пайтлар бундай имконият бўлган, лекин мен бу бобни ёпганман. Энди мен учун бу муҳим эмас. АҚШга ёмонлик тиламайман, аксинча, улар яхши ўйнашини истайман. Почеттино менга ёқади, жамоадаги бир қатор футболчилар ҳам  яхши кўраман. 

Лекин одамлар АҚШда мени доим қандайдир “ҳикоя”га айлантиришни тўхтатишлари керак, — дея Маршнинг сўзларини Time нашри келтиради.

Марш шунингдек, ўзини америкалик эканидан фахрланишини таъкидлади. Бироқ у ҳозир Италия ва Мексикада экспат сифатида яшашини, анча вақтдан бери Америка байрамларини нишонламаслигини айтди. Унинг таъкидлашича, бутун диққат-эътибори Канада футболида "Канада ДНК"ни шакллантириш лойиҳасига қаратилган.