Месси нега “Олтин тўп”га даъвогарлар сафига киритилмади?

Франциянинг машҳур нашри L'Equipe 2022 йилги “Олтин тўп” соврини даъвогарлари рўйхатига Криштиану Роналду куритилиб, нега Лионель Месси йўқлигига изоҳ берди.

“Олтин тўп”нинг амалдаги соҳиби,  бу совринни етти маротаба қўлга киритиб, рекорд ўрнатган Лионель Месси 2005 йилдан бери илк маротаба номзодлар қаторига киритилмади.

L'Equipe нашри мутахассисларнинг бунга асосий сабаб сифатида Лионель Мессининг ПСЖдаги фаолияти кутилганидек ёрқин чиқмаганини кўрсатмоқда. Лео ўтган мавсумда ўзининг юксак формасига чиқа олмади, парижликларга устозлик қилган Маурисио Почеттино билан муносабати бузилди, лигада фақат олтита гол урди, Чемпионлар лигасини эрта тарк этди.

Роналдунинг “Олтин тўп” рўйхатига киритилишига унинг терма жамоалар тарихида энг зўр тўпурарга айлангани, Чемпионлар лигаси гуруҳ босқичида олтита тўп киритгани, мавсумни 49 та ўйинда 32 та гол билан якунлагани асос қилиб кўрсатилди.