Мессининг “Барса” бош мураббий билан можароси қандай бўлганини айтиб беришди

“Барселона”нинг собиқ дарвозабони Хорди Масип 2015 йилда Лионель Месси ва ўша пайтдаги бош мураббий Луис Энрике ўртасида можаро бўлиб ўтганини айтди.

Маълумки, айни пайтда ПСЖ билан Франия чемпионлигини қўлга киритган Луис Энрике мураббийлик фаолияти давомида 2014-2017 йилларда “Барселона”ни ҳам бошқарган.

- Ҳақиқатан Лионель Месси ва Луис Энрике ўртасида кучли зиддият бўлган. Лекин иш уруш-жанжалгача етиб бормаган. Ўша даврда жамоадаги вазиятни инобатга олсак, бу нормал ҳолат эди.

Охир-оқибат “Барселона” требл қайд этганидан кейин, бу кўнгилсизларнинг бари унутилиб кетди, - деди Хорди Масип.

Эслатиб ўтамиз, Лионель Месси 2002 йили “Барселона” тизимига келган ва 2021 йилнинг ёзигача ушбу клуб аъзоси сифатида фаолият кўрсатган. Каталонияни тарк этишга мажбур бўлган аргентиналик юлдуз кейинчалик икки мавсум ПСЖда тўп тепди. Лео 2023 йилнинг ёзидан бери “Интер Майами” ўйинчиси ҳисобланади.