Бугун “Металлург” марказий стадионидаги мажлислар залида клубнинг кенгайтирилган йиғилиши бўлиб ўтди. Унда клуб тасарруфидаги барча йўналишлар бўйича биринчи чоракда амалга оширилган ишлар ҳисоботи кўриб чиқилди. Жамоаларнинг мавсум тайёргарлиги ва старти таҳлил этилди. Шунингдек, тизимлар олдига қўйилган мақсад вазифаларга эришиш борасида қатъий чора-тадбирларни ишлаб чиқиш, иш интизомини кучайтириш, йўналишлар бўйича кадрлар мувофиқлигига эришиш юзасидан фикр ва мулоҳазалар баён этилди.

Йиғилишда “Металлург” ПФК бош директори А. Маърифалиев, техник директор Ш.Саидов, клуб юристи Ш.Нурматова, “Металлург” ПФКда узоқ йиллардан буён ушбу клубда фаолият юритиб келаётган тажрибали мутахассис Ш.Йўлдошевлар маъруза қилишди. Клубда иш интизомини ошириш, ишга бўлган масъулиятни кучайтириш, берилган топшириқ, вазифаларни ўз вақтида, мукаммал бажариш сингари долзарб масалалар кўтарилди. “Металлург” футзал жамоасидан С.Курочкин, “Металлург-вумен” жамоасидан Р.Холиқовлар ҳам сўзга чиқишиб, мазкур тизимларда мавжуд камчиликлар ва уларни бартараф этиш чора-тадбирлари ҳақида мулоҳазаларини билдиришди.

Табдир якунида клуб бош директори А.Маърифалиев кадрлар мувофиқлигини таъминлаш борасидаги ўз қарашларини йиғилиш иштирокчилари яна бир бор баён этди. Тизимларда баъзи ходимларнинг ўз вазифаларига сидқидилдан ёндашмаётганлиги, ишга вақтида келмаслик, топшириқларни бажаришдаги оқсаш каби ҳолатлар танқид қилинди. Клубда иш самарадорлигини ошириш, иш интизомини кучайтириш юзасидан таклифларини билдирди.

Йиғилишда кўриб чиқилган масалалар юзасидан тегишли қарорлар қабул қилинди.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар