Модрич жаҳон чемпионатлари тарихида кирган рекордни ўрнатди

Хорватия терма жамоаси сардори Лука Модрич жаҳон чемпионатида тарихий натижа қайд этди. Афсонавий ярим ҳимоячига тегишли бу ноёб кўрсаткич Гана терма жамоасига қарши гуруҳ босқичининг учинчи, ҳал қилувчи турида рўй берди. 

Учрашувнинг 83-дақиқасида, ҳисоб 1:1 бўлиб турган пайтда, Модрич бурчак зарбасини йўллади. Унинг узатмасини бош билан аниқ дарвозага жойлаган Никола Влашич ғалаба голини урди. Бу гол хорватларга 2:1 ҳисобида жуда муҳим ғалабани тақдим этиш билан бирга, жамоага L гуруҳида иккинчи ўринни ва 1/32 финалга йўлланмани ҳам кафолатлади.

Айнан шу голли узатма туфайли хорватиялик ярим ҳимоячи жаҳон чемпионатлари тарихида энг катта ёшда ассист берган футболчига айланди. Ушбу ўйин куни Модрич 40 ёш 291 кунлик эди. Унга қадар рекорд уч кун давомида босниялик Эдин Жеко қўлида эди — у 24 июнь куни Қатарга қарши ўйинда 40 ёш 109 кунлик пайтида голли узатма берганди. Жекодан олдин эса бу кўрсаткич бразилиялик Тиаго Силвага тегишли бўлиб, у 2022 йилги мундиалда Жанубий Кореяга қарши баҳсда 38 ёш 74 кунлик чоғида ассист қайд этган эди.

Модрич жаҳон чемпионатларининг кумуш (2018) ва бронза (2022) медаллари соҳиби, шунингдек 2018 йилги «Олтин тўп» эгаси ҳисобланади. Клуб даражасида эса у тарихдаги энг совриндор футболчилардан бири сифатида эътироф этилган.

У ўз фаолияти давомида 6 марта Чемпионлар лигасини, 4 марта Испания чемпионлигини, 2 марта Испания Кубогини, 5 марта Испания Суперкубогини, 5 марта УЕФА Суперкубогини, 6 марта ФИФА клублар ўртасидаги жаҳон чемпионлигини қўлга киритган. Шунингдек, Загребнинг «Динамо» жамоаси таркибида 3 марта Хорватия чемпионатида, 2 марта Хорватия Кубогида ва бир марта Хорватия Суперкубигада ғолиб чиққан.

Мадриднинг «Реал» клубида 13 йил давомида ўйнаган Модрич жами 28 та соврин ютиб, клуб тарихидаги энг кўп титул қўлга киритган футболчига айланди.