Moskvaning “Spartak” jamoasi uchrashuv o‘tkazgani O‘zbekistonga kelishi kutilmoqda

16 iyul, 2024, 20:03
Zohir Toshxo’jayev
1
Futbol

Yangi mavsumga tayyorgarlik ko‘rayotgan Moskvaning “Spartak” jamoasi kuni kecha O‘zbekiston Superligasi peshqadami “Nasaf” bilan o‘rtoqlik uchrashuvini o‘tkazdi.

Moskvadaga “Lukoyl Arena”da o‘tkazilgan bellashuv mezbonlarning 3:0 hisobidagi g‘alabasi bilan yakunlangan edi. “Spartak”ning gollariga Daniil Denisov, Pavel Meleshin va Daniil Zorin mualliflik qildi.

Rossiya futbolini yoritib kelayotgan “Match TV” durnalistlari “Nasaf” klubi direktori Alisher Yusupovdan “Spartak” klubi bilan hamkorlik borasidagi fikrlarini so‘radi.

- “Spartak” klubiga taklif uchun katta minnatdorlik bildiramiz. Biz bunday uchrashuvda qatnashishdan juda mamnun bo‘ldik. Barcha tashkiliy masalalar yuqori darajada hal qilindi.

“Spartak” xodimlariga rahmat. Umuman olganda, uchrashuv qiziqarli bo‘ldi. Balki o‘yin juda tomoshabop chiqmagandir, lekin yorqin holatlar kuzatildi.

- Moskvadagi hamkasblaringiz bilan O‘zbekistonda javob uchrashuvini tashkil qilish masalasini muhokama qildingizmi?

- Ha. Biz “Spartak” klubi bosh direktori bilan uchrashuv o‘tkazdik va bu masalani ham muhokama qildik. Hammasi taqvimga borib taqaladi. Bu uchrashuvni tashkil qilish ehtimoli bor. “Spartak” rahbariyati bunga qarshi emas.

Ta’kidlash joizki, “Spartak” Rossiya futbolining eng mashhur va eng muxlisga ega klubi hisoblanadi. O‘z davrida, Evropa miqyosidagi xalqaro musobaqalarda ham muvaffaqiyatli ishtirok etib kelgan.

Turli yillarda “Spartak” jamoasi safida Andrey Pyatnitskiy, Valeriy Kechinov, Ja’far Irismetov singari O‘zbekiston futbolining yorqin tarbiyalanuvchilari muvaffaqiyatli to‘p tepgan.

Yangi mavsumda “spartakchilar” oldiga chempionlikni qo‘lga kiritish vazifasi qo‘yilgan. Serbiyalik mutaxassis Deyan Stankovich bosh murabbiyligidagi “Spartak” Premer-liganing navbatdagi mavsumini 21 iyul kuni boshlaydi.

Shu kuni moskvaliklar safarda “Orenburg” jamoasiga qarshi maydonga chiqadi.

O‘z navbatida, “Nasaf” joriy mavsumda Superligada yakka peshqadam bo‘lib turibdi. Qarshi shahri jamoasi 13 ta uchrashuvda ettita g‘alaba, beshta durang va bitta mag‘lubiyat qayd etib, jami 26 ochko jamg‘argan.

“Nasaf” futbolchilari eng yaqin ta’qibchilari – OKMK va “So‘g‘diyona” jamoalaridan uch ochkoga o‘zib ketgan.