Моуриньо “Рома” эшикларини “Челси” юлдузларига очди!
Жозе Моуриньога “Челси” тарбиясини кўрган ёш футболчилар жуда маъқул келмоқда. Айниқса, ўтган йили ёзда “аристократлар”дан олинган Тэмми Абрахам римликларнинг ғалабаларига катта ҳисса қўшиб келаётгани “Челси” ўйинчиларига бўлган эътиборни янада кучайтирди.
Энди португалиялик мутахассис лондонликлар академиясини битирган 22 ёшли Конор Галлахерни ўз жамоасига чорламоқда. Галлахер ҳали асосий жамоада бирорта учрашув ўтказмаган. Жорий мавсумда ижара асосида “Кристал Пэлас” шарафини ҳимоя қилиб келмоқда.
Галлахер бу жамоадаги ўйинлари орқали сифатли футболчи эканини намойиш эта олди. Англия премьер-лигасида 25 та учрашувда қатнашган ярим ҳимоячи рақиблар дарвозасини саккиз маротаба ишғол қилди ва жамоадошларига учта голли пас оширди.
“Кристал Пэлас” етакчисига айланган ўйинчи айни пайтда бир неча клублар нишонида турибди. Томас Тухель ҳам уни ёзда асосий таркибга жалб қилиб, мавсум олди йиғинларида шахсан синовдан ўтказмоқчи.
Шунга қарамай, Жозе Моуриньо англиялик истеъдоди эгасини Римга келишига қатъий ишонмоқда.
Моуриньога зўр ҳимоячи керак
“Рома” скаутлари ёзда жамоага олиб келинадиган чап қанот ҳимоячиси қидирмоқда. Улар анчадан бери “Фейеноорд”да муваффақиятли ўйнаб келаётган аргентиналик Маркос Сенезини кузатяпти.
24 ёшли футболчининг нидерландияликлар билан ҳамкорлигини бир йилдан сўнг якунланади. Рим клуби вакиллари мавсум охиригача у билан келиша олса, ёзда 15 миллион евро эвазига харид қилиши кутилмоқда.
Италия паспортига эга бўлган Сенези жорий мавсумда 38 та учрашувда майдонга тушди, ўзининг ҳимоядаги вазифаларини уддалашдан ташқари, рақиблар дарвозасига бир жуфт тўп киритди ва учта голли пас узатди.
Ҳамма кутган ҳимоячи тез орада қайтади
“Рома”нинг тажрибали ҳимоячиси Леонардо Спинаццола апрель ойида сафга қайтадиган бўлди. 29 ёшли ҳимоячи ўтган йили ёзда Италия терма жамоаси сафида Европа Чемпионати доирасидаги учрашувда оғир жароҳат олганди.
Спинаццола жароҳатини операция қилдириб, тўлиқ тикланиши учун 9 ой давомида футболдан четди юрди. Айни пайтда футболчи ўзини жуда яхши ҳис қилмоқда. Келаси ҳафта давомида Спинаццола Финляндиянинг Турку шаҳрига бориб ўзини операция қилган жарроҳлар кўригидан ўтади.
Мутахассислар тиббий кўрик муваффақиятли ўтган тақдирда Спинаццола 14 апрель куни Конференциялар лигаси доирасида Норвегиянинг “Будё-Глимт” жамоасига қарши бўладиган беллашувда қатнашиши мумкинлини тахмин қилмоқда.
Римликлар “Сассуоло” футболчисининг сотилишини кутмоқда
“Сассуоло” ярим ҳимоячиси Давиде Фраттези тез орада жамоасини янгилаши кутилмоқда. 22 ёшли футболчига “Интер” ва “Ювентус”дан қизиқиш борлиги айтилмоқда.
Фраттези “Рома” клуби тарбияланувчиси ҳисобланади. Римликлар истеъдодли ўйинчини 2017 йили 5 миллион еврога “Сассуоло”га сотиб юбориганида унинг келажакдаги трансферидан улуш олиши белгилаб қўйилган. Шу боис, пойтахт клуби ҳам Фраттезининг трансферидан манфаатдор.
“Сассуоло” Фраттезини олганидан кейин бу ўйинчини бир неча йил давомида “Асколи”, “Эмполи”, “Монца” клубларида ижарада ўйнайди. Жорий мавсумда Давиде “Сассуоло” сафида мазмунли ўйин кўрсатмоқда. У А Серияда 29 та учрашувда тўртта гол урди ва учта голли пас узатди.
Ҳозирги клуби билан 2026 йилнинг ярмигача давом этадиган шартномага эга футболчининг трансфери 20 миллион еврога баҳоланган.
Фикрлар