Нега “Реал Мадрид” Абдуқодир Ҳусановга қизиқмоқда?

Мадриднинг “Реал” клуби қишки трансферлар ойнасида ҳимоя чизиғини кучайтириш вариантларини кўриб чиқмоқда. Fichajes.net нашрининг ёзишича, “қироллик клуби” эътиборини “Манчестер Сити” марказий ҳимоячиси Абдуқодир Ҳусановга қаратган.

Манбага кўра, бунга бир нечта муҳим сабаблар мавжуд. Аввало, “Реал Мадрид” ҳимоясида жароҳатлар сабаб муаммолар юзага келган. Жамоада ротация имконияти чекланган ва мураббийлар штаби қисқа муддатли, аммо ишончли ечим изламоқда.

Шу нуқтаи назардан Ҳусанов номзоди мос вариант сифатида кўриламоқда. Ўзбекистонлик футболчи жисмоний жиҳатдан кучли, ҳаводаги курашларда ишончли ва замонавий марказий ҳимоячи сифатида баҳоланмоқда. Унинг тўп билан ўйнаш қобилияти ва турли ҳимоя тизимларига мослаша олиши “Реал” талабларига жавоб беради.

Яна бир муҳим жиҳат — трансфернинг молиявий томони. “Қироллик клуби” катта маблағ сарфламасдан таркибни кучайтиришни истамоқда. Шу сабаб Абдуқодирни сотиб олиш эмас, балки ижарага олиш варианти устувор ҳисобланмоқда. Бу "қаймоқранглиларга" футболчини синаб кўриш имконини ҳам беради.

Fichajes’га кўра, “Манчестер Сити” ҳам футболчининг вақтинча бошқа клубга ўтишини қарши эмас. Клуб раҳбарияти Ҳусанов мунтазам ўйин амалиётсиз қолиб кетмаслиги учун ижарани мақбул вариант сифатида кўрмоқда.

Шунингдек, “Реал Мадрид” ушбу трансферни стратегик жиҳатдан ҳам фойдали деб ҳисобламоқда. Клуб Осиё бозоридаги таъсирини кучайтиришга интилаяпти ва бу омил қарор қабул қилишда иккинчи даражали бўлса-да, ижобий рол ўйнамоқда.

Ҳозирча томонлар орасидаги мулоқот дастлабки босқичда. Келгуси ҳафталарда “Реал Мадрид” қишки трансфер ойнасидги режаларига аниқлик киритиши кутилмоқда.