Ўрган, Мбаппе! Винисиус мегашартномага эга бўлди

“Реал” раҳбарияти бразилиялик легионер Винисиус Жуниорни янги шартномага кўндириб, уни олишга уринаётган Саудия Арабистони клублари йўлини ёпиб қўйди.

Fichajes сайти тарқатган маълумотларга қараганда, Винисиус жорий мавсум якунланиши билан, клублар ўртасидаги жаҳон чемпионати олдидан янги битимни расман имзолайди. 2030 йилнинг ярмигача мўлжалланган ушбу келишувга кўра, ҳужумчининг қўлига тегадиган йиллик маош 20 миллион еврони ташкил қилади.

Бу сумма жамоанинг энг кўп топаётган вакили Килиан Мбаппенинг базавий маошидан кўп. Қолаверса, Винисиус Жуниорнинг натижаларидан келиб чиқиб, бонуслар эвазига йиллик даромади 30 миллион еврогача кўтарилиши белгиланган.

24 ёшли ўйинчининг агенти Фредерико Пено 2027 йилнинг ярмигача тузилган аввалги шартномани уч йилга узайтиришга қарор қилди. Бу орқали ушбу мутахассис ўз мижозини клубга жуда узоқ муддат боғланиб қолишини олдини олгани айтилмоқда.

Аввалроқ, Саудия Арабистони клублари Винисиус Жуниор учун “Реал”га 300 миллион евро атрофида бадал пули тўлаб, ўйинчининг ўзига беш йиллик ҳамкорлик эвазига бир миллиард евро маош ваъда қилганди.