Ўзбекистонга иккита гол урган ҳужумчининг юзига кислота сепишган!
2026 йилги жаҳон чемпионатининг “К” гуруҳида ўйнаган Ўзбекистон миллий терма жамоаси учинчи тур учрашувида Конго Демократик Республикаси футболчиларига 1:3 ҳисобида мағлубиятга учраб, кейинги босқичга чиқиш имкониятидан айрилган эди.
Ўша тўқнашувда Абдувоҳид Неъматов дарвозасини икки маротаба ишғол қилган Йоан Висса шу кунларга етгунича анча қийинчиликларни енгиб ўтишига тўғри келган экан.
Йоан Висса мундиалда учта гол уриб, ўз юрти шарафини муносаби ҳимоя қилишдан ташқари, оиласи хавфсизлиги учун қаҳрамонлик кўрсатгани ҳақида маълумотлар чиқа бошлади.
Sports.uz портали ушбу воқеани ўқувчилар эътиборига ҳавола этади.
Йоан Висса умрининг охиригача махсус дори воситаларидан фойдаланишга мажбур. У майдондан ташқари жиддий муаммоларга дуч келган ва қийинчиликларни кучли иродаси билан енгиб ўтган.
Мен бақирдим, лекин нафас ололмасдим...
Виссанинг мундиалдаги ва терма жамоадаги кейинги барча муваффақиятлари умуман содир бўлмаслиги ҳам мумкин эди.
2021 йил 1 июль куни Летисия исмли 36 ёшли аёл ўша пайтдаги Франциянинг “Лорьян” футболчиси Йоан Виссани уйи яқинида кутиб туриб, ундан автограф сўраган. Бу эса пухта ўйланган режанинг фақат биринчи қисми эди.
Аёл ярим тунга яқин яна қайтиб келиб, эшикни тақиллатган. Ҳеч қандай ёмонликни кутмаган футболчи эшикни очиши билан унинг юзига кислота сепилган. Жиноятчининг асосий мақсади эса конголик футболчининг қизини ўғирлаш бўлган.
- Мен эшикни очдим ва юзимга қандайдир суюқлик сепилди. Мен бақирдим ва нафас ололмадим, - деган эди Висса суд жараёнида.
Йоан кўзларидан оғир куйиш жароҳатларини олган бўлса-да, босқинчига қаршилик кўрсатиб, қизини ўғриланишига йўл қўймади.
Футболчи зудлик билан шифохонага ётқизилиб, икки кўзида ҳам операция ўтказилган. Шифокорларнинг тезкор ёрдами туфайли у кўриш қобилиятини сақлаб қолган, аммо энди умрининг охиригача махсус кўз томчиларидан фойдаланишига тўғри келади.
Бу ҳодиса футболчи ва унинг турмуш ўртоғининг руҳий ҳолатига ҳам қаттиқ таъсир кўрсатган. Уларнинг ҳар иккиси психолог ёрдамига муҳтож бўлган. Виссанинг аёлида депрессия ривожланган, футболчининг ўзи эса ваҳима хуружидан азият чекмоқда.
- Ўшандан кейин мен жуда ёпиқ инсонга айландим. Мен энди бегона одамлар билан бир жойда бўлолмайман. Кўчада юрганимда ҳам доимо ортимга қараб қўяман. Тунда эса ёнимда нотаниш одам бўлса ухлай олмайман, - деган ҳужумчи судда.
У ҳеч қачон нолимади...
Қизиғи шундаки, Йоан Виссанинг қизини ўғрилашга уринишдан бир кун ўтиб, Летисия яна шунга ўхшаш жиноят содир этган. Бу сафар унинг ҳужумидан кейин гамбиялик ёш аёл танаси 25 фоизга куйган.
Жиноятчи фақат 3 июль куни қўлга олинган.
Унинг ҳаракатлари сабаби жуда ғалати бўлиб чиқди. Летисия тергов давомида севгилисига ҳомиладорлиги ҳақида ёлғон гапирганини ва болани ўғрилаб, уни ўз фарзанди сифатида кўрсатмоқчи бўлганини айтган. Шунингдек, у ўсмирлик давридан бери бошида овозлар эшитилишини ҳам билдирган.
Суд жараёнлари тўрт йилдан ортиқ давом этди. Шу вақт ичида Йоан Висса юқори савияли футболчига айланди.
Бу ҳужум унинг ҳаётга бўлган қарашларини ўзгартирди ва машғулотларда янада қаттиқ меҳнат қилишга ундади.
2025 йил сентябрида Конго Демократик Республикаси миллий терма жамоаси етакчиси “Брентфорд”дан анча қудратли ва бадавлат “Ньюкасл”га 55 миллион фунт стерлинг эвазига трансфер қилинди.
- Ҳужумдан кейин у бирор марта ҳам шикоят қилмади, нолимади. Йоан фақат олдинга қараб яшашни ва ривожланишни истади. Унинг бугунги муваффақияти – қилган меҳнатининг муносиб мукофотидир, - деган унинг собиқ жамоадоши Пьер-Ив Амель BBC билан суҳбатда.
Жиноятчи аёлнинг кечирим сўраши ёки ўзини руҳий касал қилиб кўрсатишга уриниши ҳам унга ёрдам бермаган. Суд уни қотилликка суиқасд ва вояга етмаган болани ўғрилашга уриниш айби билан 18 йил озодликдан маҳрум қилди.
Ҳозир фақат Ҳусанов бор! “Сити” Осиё турнеси бўйича маълумот чиқарди
Ҳусановга япон гўзаллари ошиқ бўлди!
Ҳусанов мундиалдан хушхабар олди!
Фикрлар