Ўзбекистонга ёрдам беролмаган Ҳусановнинг аҳволи қандай? Уни майдонда кўрамизми?
Сентябрь ойига белгиланган ФИФА кунлари муносабати билан Ўзбекистон миллий терма жамоасига чақиртирилган Абдуқодир Ҳусанов 2026 йилги жаҳон чемпионати саралаш турнири доирасида Корея Халқ Демократик Республикаси ва Қирғизистон футболчиларига қарши ўтказилган икки учрашувда қатнаша олмади.
20 ёшли марказий ҳимоячида кичик жароҳат аниқлангани боис терма жамоа раҳбарияти уни “Ланс”га қайтариб юборибди.
“Ланс” ва “Лион” учрашуви Франция чемпионатининг тўртинчи турини якунлаб бериши керак. Айни пайтда Абдуқодир Ҳусановнинг аҳволи ва бўлажак баҳсда қатнашиш имконияти кўпчиликни қизиқтирмоқда.
Франция футболини ёритаётган манбалар ўзбек футболчисининг ўйини даражаси ва бўлажак беллашувда иштирок этиш имкониятини қуйидагича баҳоламоқда.
“Ланс” футболчилари терма жамоалари иштирокидаги халқаро мусобақалардан қайтганидан кейин бош мураббий Уилл Стиллнинг таркиб танлаш ва ротация имкониятлари чекланди. Айрим ўйинчиларда кичик жароҳатлар кузатилди.
Демак, таркибда ўзгаришлар бўлади. Жанубий Америкадан кеч қайтган эквадорлик Жоаннер Чавес чап қанотдаги ўрнини Дейвер Мачадога бўшатиб беради. Кевин Дансо ҳамон сафга қайтгани йўқ. Ҳимоя маркази яна Абдуқодир Ҳусановга топширилади.
“Ланс”нинг “Лион”га қарши ҳимоя учлиги Жонатан Градит, Абдуқодир Ҳусано ва Факундо Мединадан таркиб топиши кутилмоқда.
Кевин Дансонинг “Рома”га трансфери барбод бўлгани ҳимоя марказида австриялик футболчи ўрнини эгаллаши кутилган Абдуқодир Ҳусановнинг ўйин вақтига таъсир қилади. Лекин Дансонинг ҳали ҳам сафга қайтмагани оқибатида 20 ёшли ўзбек футболчиси “Лион”га қарши беллашувда ҳимоя чизиғига етакчилик қилиши кутилмоқда.
Бу баҳсда Ҳусанов бир неча ҳафтадан бери давом этиб келаётган ўзи ҳақидаги яхши таассуротларни давом эттириб, яна ишончли ўйин намойиш қилиши керак.
Абдуқодир Ҳусанов “Ланс” бошланғич таркибидан мустаҳкам ўрин эгаллашга ҳаракат қилмоқда. Ҳозирча, ўзбек футболчиси жамоадоши Кевин Дансонинг биринчи ўринбосари ҳисобланади. “Рома”нинг тиббий кўригидан ўтолмаган австриялик ҳимоячи ҳали жамоага қўшилмаган ва шу боис, “Лион” билан бўладиган тўқнашувда яна Ҳусанов бошланғич таркибда майдонга тушади.
Шундай бўлса-да, бош мураббий Уилл Стилл жамоада ҳеч кимнинг жойи кафолатмаганини билдирди.
- Энг кучлилар ўйнайди. Трансфер ойнаси жуда фойдали бўлди. Жамоа ичида кучли рақобат юзага келди. Танлов имконияти кенгайди. Бу яхши, албатта, - деди Уилл Стилл.
Қоғозда Ҳусанов Кевин Дансо, Факундо Медина ва Жонатан Градитдан кейин тўртинчи марказий ҳимоячи. Абдуқодир мавсумни юқори даражада бошлагани мураббийлар штаби йил давомида ундан кўпроқ фойдаланишидан далолат беради.
20 ёшли футболчи ўтган мавсумда барча мусобақаларда 15 маротаба майдонга тушган эди. Ўша ўйинлар у нималарга қодирлигини намойиш қила олган. Янги мавсумда августдан бери бешта учрашувда қатнашиб улгарди. У секин-аста жамоага сингиб бормоқда.
“Ланс” ва “Лион” ўртасидаги учрашув 15 сентябрь куни Тошкент вақти билан соат 23:45 да бошланади.
Тақдир Шомуродов билан бир ҳазиллашган экан...
Нохуш хабар: Машҳур легионеримиз жиддий жароҳат олди, сабр ва шифо тилаймиз!
Файзуллаев хавотирга сола бошлади...
Легионеримизнинг янги жамоаси “Челси”ни ортда қолдирди
Фикрлар