ПСЖда мазза қилиб ўйнайман, деб ўйлама! Сени ёмон кўрамиз!

ПСЖнинг ашаддий мухлислари “Бавария”дан трансфер қилинган ҳимоячи Люка Эрнандеснинг келишини салбий баҳоламоқда.

Куни кеча пойтахт клуби франциялик ҳимоячи билан 2028 йилнинг ёзигача шартнома имзоланганини расман эълон қилган эди.

ПСЖ мухлисларининг етакчиларидан бири Ромен Мабиль ижтимоий тармоқлар орқали Эрнандеса мурожаат қилиб, уни огоҳликка чақирди.

- Парижда сени кўришдан хурсанд эмасмиз ва сен тез орада буни яхшилаб тушуниб оласан, - деб ёзди Ромен Мабиль.

Парижликлар совуқ муносабатига Люка Эрнандеснинг  яқинда “Марсель”га мухлислик қилиши ҳақида гапиргани сабаб бўлди. Париж клуби учун “Марсель” энг ашаддий рақиб ҳисобланади. Қолаверса, Люканинг отаси Жан-Франсуа Эрнандес ўз даврида марселликлар шарафини ҳимоя қилган.