Қария Aлвес, бўлажак юлдуз Педри ва бошқалар! Олимпиадада қайси футболчиларни кузатиш лозим?

Футбол оламида олимпиада медалининг қадри пастроқ бўлиши мумкин, аммо турнирнинг салмоғи улкан. Кўплаб скаутлар айнан шундай турнирларда янги номларни кашф этиши мумкин.

Дани Aлвес (38 ёш, Бразилия)

Бразилия амалдаги олтин медаллар эгаси саналади. Шу боис, ушбу юрт вакиллари турнирдаги муваффақиятли юришни давом эттиришни ният қилган. Шу боис, асосий жамоа билан "катта" ўйинларда тўп сурган Дани Aлвес етакчи сифатида таркибга таклиф этилган. Футбол оламидаги энг совриндир футболчи Бразилиянинг ёш иқтидорларини қандай қилиб йўлга солиши мумкин? Бу саволга тез орада жавоб оламиз. Бундан ташқари, ҳар бир жамоа бир нечта тажрибали футболчилар билан иштирок этиш ҳуқуқига эга. Хўш, бу мусобақада қайси футболчилар янги даражага кўтарилиши мумкин? Кимларни кузатиш тавсия этилади?

Габриель Мартинелли (21 ёш, Бразилия)

Ортда қолган мавсумда ҳужумчи "Aрсенал" мухлисларини хурсанд қила олмади, аммо бунга сабаб бор. Футболчи деярли бир мавсум тиззасидан олган жароҳатини даволаш билан банд бўлди. Бу турнир Габриель нималарга қодир эканлигини барчага кўрсатиб қўйиш учун қулай имконият. Лондон клуби янги ҳужумчи изламаслиги учун ҳам Мартинелли турнирни юқори савияда ўтказиши керак.

Педри (18 ёш, Испания)

Испания терма жамоаси Токиога ғалаба мақсадида ташриф буюрганини яшириб ўтирмаяпти. Микель Оярсабалдан ташқари, Педри ҳам жамоага жалб этилгани сўзимизга исбот бўлади. 18 ёшли болакай "Евро-2020" кашфиётига айланди. "Барселона" келажакда шу йигитча атрофида қайта қурилиши ҳақидаги миш-мишлар шунчаки тарқалмаяпти. Катта футболга кириб келаётган футболчи учун халқаро соврин жуда ҳам муҳим. Педри ўз кучига бўлган ишончини янада яхшилаб олиши учун Токио майдонлари кўмак бериши мумкин.

Диего Лайнес (21 ёш, Мексика)

Лайнес "ацтеклар" таркибидаги ягона легионер футболчи саналади. "Бетис"нинг 10-рақамли ижрочисидан мексикаликларнинг умиди катта. Диего жуда ҳам фаол футболчи. У майдон марказида ҳужум темпини белгилаши, стандартларни аъло даражада ижро этиши мумкин. Шунингдек, бир ўзи бир нечта рақибларини алдаб ўтиб ҳавфли вазиятлар яратишга қодир. Хориж нашрлари берган маълумотларга қараганда, унинг ўйинларини кузатиш мақсадида юзга яқин скаутлар Японияга ташриф буюриши кутилмоқда. SPORTS.uz тавсия этади, Лайнеснинг ўйинларини кузатиб боринг!

Фаусто Вера (21 ёш, Aргентина)

Aргентиналиклар иқтидорларни жуда эрта кашф этиш борасида беназир. Вера ҳали миллий терма жамоада дебют қилгани йўқ, аммо потенциали жуда юқори. "Aрхентинос Хуниорс" шарафини ҳимоя қилувчи футболчи турнирдан сўнг Европага йўл олиши аниқ. Эътиборлиси шундаки, Фаусто жуда ҳам совуққон. Майдонда ҳеч қачон ҳиссиётларга берилмайди. Доим совуқ мия билан қарор қабул қилади. Ўйинни ҳам яхши ўқийди. Марказда чинакам "жангчи"га айлана оладиган Вера ҳам турнир кашфиёти бўлиши ҳеч гап эмас.

Ли Кан Жин (20 ёш, Жанубий Корея)

Ғалати эшитилиши мумкин, аммо қитъадошларимиз фақатгина олтин медаллар учун Японияга ташриф буюрган. Таркиб ҳам аъло даражада. Япония ва Жанубий Корея олимпия жамоалари 4 йиллик режа асосида мусобақага тайёргарлик кўради. Саралашдан ўтгач, энг оптимал таркибга эга бўлади. Тўғри йўлга қўйилган иш уларни топ даражадаги термалар даражасида иштирок этиш имкониятини яратади. "Валенсия" ҳужумчиси "Осиё йўлбарслари"нинг асосий ҳужум кучи. Тезкор, чаққон, курашлардан қочмайдиган Ли ўз меҳнаткашлиги билан испанларни ҳайратда қолдирди. Энди, бу ишни Япония майдонларида такрорлаш қолди, холос.

Натан Мбуку (19 ёш, Франция)

Франция U19 сафида 11 ўйинда 9 гол урган Натан ўз ҳаракатлари билан Муҳаммад Салаҳни эслатиб юборади. Тезлик, техника ва чаққонлик бобида у яқин йиллар ичида Миср афсонасини қувиб ўтиши ҳам мумкин. Французларнинг таркибни аъло даражада танлаганига қойил қолмасликнинг имкони йўқ.
Икки қанотда ҳам бирдек фаол тўп суришга қодир универсал мусобақанинг энг яхши футболчиси бўлиши ҳам мумкин. Бунинг учун французлар имкон қадар узоқроққа бориши талаб этилади.

Рейнер Жезус (19 ёш, Бразилия)

Тан олиш лозим, иқтидорлар борасида ҳеч қайси жамоа Бразилия билан беллаша олмайди. "Пентакампеонлар" шунчаки "юлдузчалар" коллекцияси билан Осиёга ташриф буюрди. Трансфер ҳуқуқи "Реал"га тегишли бўлган Рейнер "Боруссия" Дортмундда иккинчи имконга эга бўлиш арафасида. Санчо кетгач, Дортмунд жамоаси Рейнерни биринчи планга олиб чиқишини Мадрид клубига маълум қилган. Бразилияни бежизга футбол афсунгарлари ватани, деб аташмайди. Катта мавсум олдидан вингер Японияда "фурор кўтариши" ҳеч гап эмас!

Такефусо Кубо (20 ёш, Япония)

Майдон эгаларидан бир вакил кўрсатмаслик, адолат эмас. Ёш бўлишига қарамай, аллақачон "Барселона" ва "Реал" шарафини ҳимоя қилишга улгурган даҳо "кунчиқар юрт" вакилларининг суянган тоғига айланган. Тўғри, Япония доимо кучли жамоавий ўйин эвазига ғалаба қозонган, аммо топ даражадаги ижрочилар ҳеч кимга ортиқчалик қилмайди. Кубо ўз фаолиятидаги илк улкан турнирни қарши олиш арафасида. SPORTS.uz Кубо сингари рўйхатдаги бошқа футболчиларга ҳам омад ва зафарлар тилаб қолади.