"Қатар-2022". "Ўлим" гуруҳи, асосий фаворитлар, ёқимли жамоа ёхуд "Андижон" футболчилари мундиалда кимга ва нима учун мухлислик қилишини биласизми?

Ҳар тўрт йилда ўтказиладиган футбол оламининг энг йирик ва қудратли мусобақаси бўлган жаҳон чемпионати бу йил қитъамизда ўтказилишидан яхши хабардорсиз. Қатар мамлакати 21 ноябрдан 18 декабрга қадар бўлиб ўтадиган мундиалга жуда катта тайёргарлик кўрмоқда.

Яқинда Доҳада жаҳон чемпионати учун қуръа ташлаш маросими ҳам бўлиб ўтди. Бутун дунё нигоҳи бўлажак мундиалга қаратилиши шубҳасиз. Табиийки, Ўзбекистонда ҳам мундиални кутаётганлар бисёр. Айниқса, қуръа ташланганидан сўнг, бу борада фикрлар, ўзига хос муносабатлар янграй бошлади ва бу табиий ҳол. Ахир бу жаҳон чемпионатининг қуръаси ва гуруҳлардан қайси терма жамоаларнинг жой олганига ҳам дунё эътибор қаратди.

Хуллас, нафақат ўзбек мухлислари, балки ўзимиздаги футболчилар учун ҳам Қатардаги мундиалга ташланган қуръа жуда қизиқ эди. Чунки ҳамманинг ўзига яраша мухлис қиладиган терма жамоалари бор. Шуни инобатга олган ҳолда мухлисларга янада қизиқ бўлиши учун клубларимиздаги футболчиларнинг бўлажак мундиал олдидан қуръа борасидаги фикрларини билишга интилдик.

Аввало, “Андижон” клубига ўзимизнинг учта саволимиз билан юзландик ва жамоанинг ҳар бир футболчиси ўз жавобларини билдирди. Демак, учта савол қуйидагича:     

1. Жаҳон чемпионатида сиз учун “ўлим” гуруҳи қайси?

2. Қатардаги мундиалда қайси терма жамоага мухлислик қиласиз ва нима учун?

3. Жаҳон чемпионатида асосий фаворитлар кимлар?

Дарвозабонлар:

Хуршид Хўжаев

1. Мен учун “ўлим” гуруҳи – Испания, Германия, Япония жой олган “Е” гуруҳи.

2. Германия терма жамоасига мухлислик қиламан Чунки уларнинг ўйини менга ёқади.

3. Фаворитлар – Германия билан Англия.

Элдор Адҳамов

1. “Е” гуруҳи қийин. Шу боис бу “ўлим” гуруҳи.

2. Португалияга мухлисман. Чунки Криштиану Роналду тўп суради.

3. Португалия, Франция ва Германия.

Ҳимоячилар:

Абдураҳмон Комилов

1. “Н” “ўлим” гуруҳи.

2. Жаҳон чемпионатида Испания термасини қўллаб-қувватлайман. Чунки бу жамоанинг ўйин услубини ёқтираман.

3. Асосий фаворитлар – Испания, Бразилия, Португалия ва Германия.

Абдувоҳид Ғуломов

1. “Ўлим” гуруҳи сифатида “Н” гуруҳини айтган бўлардим.

2. Англия. Чунки премьер-лига ўйинлари жуда қизиқарли ва томошабоп бўлгани учун.

3. Фаворитларга келсак, Англия, Португалия ва Бразилия.

Аҳмад Анваров

1. Мен учун “Е” “ўлим” гуруҳи.

2. Ёш ва иқтидорли футболчиларига эга бўлгани учун Испания.

3. Испания, Франция ва Германия.

Илдар Маматказин

1. “Ўлим” гуруҳи – бу “F” гуруҳи.

2. Бельгия. Бу терма жамоа ўтган сафарги жаҳон чемпионатида ҳам яхши ўйин кўрсатган.

3. Бельгия, Бразилия ва Франция.

Владимир Бубанья

1. “Ўлим” гуруҳи “F”.

2. Албатта, Сербия. Ахир бу менинг юртим.

3. Бразилия, Франция ва Бельгия.

Ислом Маматказин

1. “Е” - “ўлим” гуруҳи.

2. Англия. Ахир премьер-лигада зўр ўйинлар бўлади.

3. Англия билан Франция.

Азамат Исроилов

1. “Ўлим” гуруҳи – “Е”.

2. Франция. Чунки яхши таркибга эга.

3. Франция билан Бразилия.

Илҳом Алижонов

1. “Ўлим” гуруҳи – “F”.

2. Сенегал. Боиси, бу терма жамоада Мане ҳамда Кулибали тўп суришади.

3. Бразилия ҳамда Франция.

Ярим ҳимоячилар:

Иброҳим Мухторов

1. “Е” – “ўлим” гуруҳи.

2. Мундиалда Аргентинага мухлислик қиламан. У ерда Месси борлиги учун.

3. Фаворитларга келсак, Аргентина билан Франция.

Шерзод Эсонов

1. Менинг назаримда “ўлим” гуруҳи – бу “Е” гуруҳи.

2. Мухлислик қиладиган жамоам Германия.

3. Жаҳон чемпионатида учта фаворит бор. Булар – Бельгия, Германия ва Франция.

Илҳом Абдуғаниев

1. Жаҳон чемпионатида мен учун “ўлим” гуруҳи - “С”.

2. Бельгия ва Англия терма жамоасига мухлислик қиламан. Бу термаларнинг ўйин услуби ёқади.

3. Англия, Португалия ва Бразилия.

Фарҳод Соҳибжонов

1. “Е” мен учун “ўлим” гуруҳи.

2. Бразилияни ёқтираман. Сабаби, у ерда техникаси юқори бўлган футболчилар бор.

3. Бразилия ва Франция.

Муҳаммадкарим Тоиров

1. “Ўлим” гуруҳи – “Е”.

2. Франция. Чунки таркибида яхши савиядаги ижрочилар ўйнайди.

3. Франция билан Испания.

Аҳрор Иноятов

1. “Е” гуруҳини “ўлим” гуруҳи деб ҳисоблайман.

2. Роналду борлиги учун Португалия термасини ёқтираман.

3. Франция ва Португалия.

Горон Милойко

1. “G” “ўлим” гуруҳи.

2. Сербия. Юртимга яқин. Тили, маданияти ва бошқа жиҳатлар бўйича ҳам Черногорияга ўхшайди.

3. Бразилия билан Франция.

Бобур Давлатов

1. “С” гуруҳини “ўлим” гуруҳи деб ҳисоблайман.

2. Мен мундиалда Бразилияга мухлислик қиламан.

3. Аргентия, Германия ҳамда Бразилия.

Ҳужумчилар:

Миржалол Мирзаев

1. “Ўлим” гуруҳи – “Е”.

2. Испания. Чунки ажойиб ёшлардан иборат ва доим пас ўйин кўрсатишлари ёқади.

3. Испания билан Франция.

Саидумар Содиқов

1. “Ўлим” гуруҳи “Н” гуруҳи.

2. Португалия. Ахир у ерда Роналду бор.

3. Португалия, Германия ҳамда Испания.

Маликшох Расулов

1. “Н” “ўлим” гуруҳи.

2. Франция. Чунки кўрсатадиган ўйинини ёқтираман.

3. Фаворитлар – Франция ва Испания.

Богдан Милич

1. Мен учун “ўлим” гуруҳи – бу “F” гуруҳи ҳисобланади.

2. Сербия. Боиси, бу менинг юртимга яқин.

3. Бразилия, Франция ва Испания.

Иззат Абдулҳақов

1. Мен учун “ўлим” гуруҳи Португалия, Гана, Уругвай ва Жанубий Корея жой олган “Н” гуруҳи.

2. Мен Португалияга мухлисман. Сабаби бу терма жамоа сафида Криштиану Роналду ўйнайди. Унинг ўйинларини ёқтираман.

3. Португалия, Франция ва Германия.

Шаҳбоз Эркинов

1. “Ўлим” гуруҳининг ўзи йўқ.

2. Нидерландия. Чунки ёшлигимдан шу терма жамоага мухлислик қиламан.

3. Англия, Бельгия, Франция ва Бразилия.