Rabo so‘ragan maosh “Barsa”ni ham qo‘rqitib yubordi

“Barselona” maydon markazini kuchaytirish maqsadida erkin agent maqomida yurgan Adrien Raboni o‘z safiga qo‘shib olishga urinayotgan edi.

Kataloniya klubida yarim himoyada o‘ynaydigan bir necha futbolchilar jarohat tufayli uzoq muddatga maydonga tusholmaydi.

Mundo Deportivo nashrining yozishicha, frantsiyalik 29 yoshli o‘yinchining agentlari muzokara davomida kataloniyaliklardan har mavsum uchun 10 million evrodan maosh so‘ragan. Manbaga ko‘ra, “Barselona” bu talabni bajara olmaydi. Ular Rabo maosh talabini pasaytirsagina hamkorlik amalga oshishini ta’kidlamoqda.

Yozda “Yuventus”dan ketgan Adrien transfer oynasi vaqtida “Manchester Yunayted”, “Milan”, “Galatasaray”, “Inter”, “Bavariya”, “Real” va “An-Nasr” kabi klublar bilan muzokara o‘tkazib, ulardan ham yiliga 10 million evro xizmat haqi so‘ragani sababli kelishuvga erisha olmagan edi.