"Реал" қўрғони Рамоснинг сири фош бўлди

“Ювентус” ҳимоячиси Жоржо Кьеллини “Реал” ҳимоячиси Серхио Рамос ўйинларидан ҳайратланишини маълум қилди.

- Рамос дунёнинг энг зўр ҳимоячиси. Уни тактикага амал қилмаслик ва бунинг оқибатида мавсум давомида 8-10 та гол бўлишида айблашади. Лекин унинг техникаси ўта кучли ва у ҳужумчи бўлиши ҳам мумкин, - дейди Жоржо.

Шунингдек, италиялик футболчи ҳамкасбнинг ҳимоячиларга хос сирини ҳам очди.

- Унинг ҳеч кимда учрамайдиган икки устунлиги бор. Биринчиси, муҳим ўйинларда масъулиятни ўзига олиб, ҳал қилувчи роль ўйнай олади. Иккинчиси эса, у рақибнинг муҳим ўйинчиларига айёрона тарзда жароҳат етказиш усулларини жуда яхши билади.  У 2018 йилги Чемпионлар лигаси финалида “Ливерпуль”нинг энг хавфли ҳужумчиси Муҳаммад Салоҳга ана шундай жароҳат етказди. Гарчи Рамос ҳаммаси тасодифан бўлганини айтса ҳам, у ўша вазиятда рақиб қўлини қўйиб юбормасдан йиқилса,  бундай ҳолатнинг ўнтадан тўққизтаси қўл синишини яхши биларди, - дейди Кьеллини.

Кьеллини эсга олган финал баҳсининг 30-дақиқасида Муҳаммад Салоҳ Рамос етказган жароҳат туфайли майдонни кўз ёшлари билан тарк этган.